Bilinken: Mirina Sînwar ji Hemasê re derfeta îmzekirina peymana agirbestê çêkir

PeyamaKurd – Wezîrê Derve yê Amerîkayê Antoy Blinken, di serdana xwe ya Qeterê de, ragihand ku wê Amerîka bi nirxê 135 milyon dolaran alîkariyê bide filîstîniyên li Şerîda Xeze û Şerîaya Rojava.

Blinken, di çarçoveya geşta xwe ya Rojhilata Navîn de, serdana paytexta Qeter Dohayê kir û ji aliyê Wezîrê Derve yê Qeterê Muhammed bin Abdulrahman Al Thanî ve hate pêşwazîkirin.

Blinken di hevdîtinê de, banga agirbestê bo Şerîda Xezeyê kir û da zanîn, dê şandên wan ji bo pêşxistina agirbestê û gavên bên avêtin rojên pêş lihev bicivin.

Herwiha Blinken got, Amerîka hewl dide dîlên îsraîlî vegerin malên xwe û dawî li şer û êşên filîstîniyan jî were.

Wezîrê Amerîkî, ji bo Hemasê jî diyar kir ku êdî Yehya Sînwar tune ye û derfeta Hemasê çêbûye peymaneke ji agirbestê re bibe bingeh îmze bike.

Blinken diyar kir ku ji 7ê Cotmeha 2023yan ve alîkariyên Amerîkayê bo Filîstîniyan gihîştiye 1,2 milyar dolaran û ew dê bi nirxê 135 milyon dolaran alîkariyeke din bidin filîstîniyan.