Daxuyaniya Leyla Zana ya li ser peyama Helebce û banga Ocalan

PeyamaKurd – Siyasetmedara Kurd Leyla Zana di daxuyaniya xwe ya bi boneya 37emîn salvegera Komkujiya Helebceyê de bal kişand ser banga Abdullah Ocalan a ji bo PKKê dest ji çekan berde û hilweşîne, firsendeke dîrokî ye.

Leyla Zana bi boneya 37emîn salvegera kîmyabarana Helebceyê di dema desthilatdariya dîktatorê hilweşiyayî yê Iraqê Seddam Husên de di 16ê Adara 1988an de li ser hesabê xwe yê medyaya civakî X peyameke bîranînê parve kir.

Zana di peyama xwe de yekem car piştgirî da banga Abdullah Ocalan û diyar kir ku ji bo bidawîkirina komkujiyan û aştiyeke mayînde divê Abdullah Ocalan jî di nava pêvajoyê de cih bigire û diyar kir ku Kurd tevî zext û gefan jî biryardariya xwe ya aştiyê didomînin.

“Êşa qetlîama Helebçeyê ku berî sî û heft salan pêk hat û hemû cîhan şahidiya wê kir û wek jenosîd hat dîtin, hîna teze ye! Di salvegera birîna Helebceyê ya ku nehatî pêçan de banga birêz Ocalan a ji bo bidawîkirina qetlîamên li Rojhilata Navîn û erdnîgariya Kurdistanê firsendeke dîrokî ye.” Zana wiha dewam kir:

'Divê em di berpirsyariya xwe de dudilî nebin'

“Girîngiyeke jiyanî ye ku ev bang bi pêşengiya wî bikeve jiyanê û bibe pratîkê. Kurd li hemberî komkujî, mirin, zor, zext û tehdîdan serî natewînin û hê jî biryardariya xwe ya aştiyeke bi rûmet û mayînde diparêzin. Kesên ku li Helebceyê hatin qetilkirin bi rêzdarî, merhemet û minetdarî bibîr tînim. Divê em dudil nebin ku berpirsiyariya xwe hilgirin da ku êşên wiha dubare nebin. Her çend avakirina nû dijwar be jî, ew rêya herî realîst e. Ji bo vê hewldan, ked, xîret, cesaret û îrade dixwaze.

Banga Bahçelî û Erdogan!

Ji desthilatdariyê heta mûxalefetê banga “Aştî û Civaka Demokratîk” pêwîstiya me hemûyan heye. Daxwaza me; Biryara her kesê ku di vê dema dîrokî de ji Birêz Serokomar û Bahçelî dest pê dike ji bo “jiyan, ne mirin” însiyatîfa xwe digre, ji bo çareseriyeke mayînde, ne şikev û mayînde, ne demkî, bi îrade berpirsyariya xwe bi cih bîne. Ev berpirsiyariya me ya hevpar e. Aştî bereket e. Jiyan e.”