Heyeta Îmraliyê ya DEM Partiyê serdana DEVA Partiyê kir

PeyamaKurd – Heyeta DEM'ê ya Îmraliyê di berdewamiya serdanên xwe yên partiyên siyasî de piştî CHP'ê bi DEVA'yê re hevdîtin kir. Serokê Giştî yê DEVAyê Alî Babacan piştî civînê daxuyanî da û got, "Divê Erdogan di demek herî kurt de helwesta xwe eşkere bike."

Hevdîtinên Nûnertiya Partiya DEMê ya ku li Îmraliyê bi Abdullah Ocalan re hevdîtin pêk anî, bi partiyên siyasî re di roja sêyemîn de dewam dike. Heyeta ku ji Sirri Sureyya Onder, Pervîn Buldan û Ahmet Turk pêk dihat herî dawî bi DEVA Partiyê re hevdîtin pêk anîbû.

Di civîna ku li Navenda Giştî ya DEVAyê hat lidarxistin de, Serokê Giştî yê DEVAyê Alî Babacan, Alîkarê Serokê Giştî Sadullah Ergîn, Mehmet Emîn Ekmen, Îbrahîm Çanakçi û Alî Îhsan Merdanoglu jî amade bûn.

Di daxuyaniya hevpar a piştî hevdîtinê de Alî Babacan got, "Me civîneke pir berhemdar pêk anî" û ev tişt gotin:

"Bingeha rewa ya çareseriya pirsgirêkên Tirkiyeyê siyaseta demokratîk e. Bi van prensîbên bingehîn tevgerîn her tim gihandina armancê hêsantir dike. Ji 1ê Cotmehê û vir ve li welatê me hewayeke nû derketiye holê. Em difikirin ku xebatên di vê pêvajoyê de hatine kirin, di hewldana çareseriyê de hêja ye. Em li pişt her pêngava ji dil a çareseriyê radiwestin. Em giringiyê didin wê yekê ku şirîkên hikûmetê di vê pêvajoyê de bi dilpakî tevbigerin. Heta îro me bi zelalî nedîtiye ku birêz Erdogan di vê mijarê de li ku ye. Belê, Meclis platformeke pir girîng e, lê ji ber ku sîstema desthilatdariyê ya heyî divê birêz Erdogan di zûtirîn demê de nêrîna xwe zelal bike."