Kremlînê bersiva Ermenistanê da: Rûsya naçe cihekî…

PeyamaKurd- Kremlînê bersiva daxuyaniyên Serokwezîrê Ermenistanê Nikol Paşinyan da ku ji ber nekirina alîkariya di şer û aloziyên Azerbayncan-Ermenistanê de, rexneyên tund li Rûsyayê girtibûn.

Paşînyan di hevpeyvîna ligel rojnameya La Repubblica ya Îtalî de gotibû, Rûsyayê di êrîşa ser Qerebaxê de û alîkariyên leşkerî de, sozên xwe bicih neanîne û ewlekariya herêmê dabîn nekiriye. Herwiha Paşînyan diyar kiribû ku Rûsyayê piştî şerê Ukraynayê ji herêma Kafkasan paşve kişiyaye û terka wan daye.

Berdevkê Kremlînê Dmitri Peskov, li ser pirsa rojnamevanan derbarê mijarê de got, baregeha Rûsyayê li herêmê heye û hêzên aştiyê şandine Qerebaxê û diyar kir, Rûsya hê jî rola xwe li Kafkasan dilîze.

Peskov herwiha got: "Ne mimkun e em van rexneyan qebûl bikin. Rûsya beşeke jêneger a herêmê ye. Rûsya naçe cihekî û vê plan jî nake.”