Li Hewlêrê Baxçeyê Ajalan ê herî mezin ê li Rojhilata Navîn vedibe

PeyamaKurd – Hat ragihandin ku sibe baxçeyê ajalan ê herî mezin li Rojhilata Navîn li paytexta Herêma Kurdistanê Hewlêrê tê vekirin.

Berpirsê ragihandina baxçeyê ajalan li Hewlêrê Mihemed Omer ji medya Kurdistanê re da xuyakirin, Baxçeyê Ajalan ê Hewlêrê ku baxçeyê ajalan ê herî mezin e li Rojhilata Navîn, li bajarê Hewlêrê hatiye çêkirin û sibe 15ê Gulanê deriyên xwe ji hemwelatî û geştyaran re vedike.

Hat diyarkirin ku di vî baxçeyî de bi sedan sewal û baskdarên cur bi cur û hatine perwerde kirin hene, ku piraniya wan azad in, ango nav qefes û xaniyekî de nînin û gelek balkêş in.

Mihemed Omer gotiye, ji ber ku her sal bi hezaran geştiyarên navxwe û biyanî serdana navçeyên geştyariyê yên li sînorê bajarê Hewlêrê dikin, wê gelek kes serdana vî baxçeyî jî bikin.