Mezlûm Ebdî eskere kir: Me ev pêsniyarên xwe bi rêya Jeffrey gihandin Tirkiyê...

PeyamaKurd - Fermandarê Giştî yê Hêzên Sûriyeya Demokratîk (HSD) ragihand, ji bo avakirina herêma ewle li rojhilatê Firatê, wan daxwaza derketina hêzên Tirkiyê ji Efrînê nekiriye.

Fermandarê Giştî yê HSDê Mezlûm Ebdî ji malpera “AL-Monitor” re da xuyakirin ku piştî gefên Tirkiyê yên êrîşa li ser Rojhilatê Firatê, wan bi rêya Amerîka hewl daye ji bo avakirina herêma ewle danûstandinê bi Tirkiyê re bikin û wan çareseriyeke hemû alî jê razî bibin bi rêya Nûnerê Taybet ê Amerîkayê li Sûriyê James Jeffrey pêşkêşî Tirkiyê kiriye.

Pêşniyarên Fermandarê Giştî yê HSDê eşkere kirine wiha ne:

• Herêma ewle a Tirkiyê bi kûrahiya 30 K.M pêşniyaz kiriye nayê qebûlkirin û divê bi kûrahiya 5 K.M be.
• Yekîneyên Parastina Gel (YPG) ji wê navçeyê vekişe û hêzên Encûmenên Leşkerî yên Xwecihî lê bêne belavkirin.
• YPG amade ye çekên xwe yên giran ji herêma ewle vekişîne û dikare çekên ku dikarin bigihin Tirkiyê jî vekişîne.
• Li hemberê jî Tirkiye pabend be û êrîş neke.
• Hêzên çavdêriyê yên navdewletî lê belav bibin.
• Nabe Tirkiye bibe beşek ji erkê çavdêriyê û divê hêzên li wê herêmê bicih bibin, hêzên bêalî bin.
• Nabe Tirkiye tevlî hêz navdewletî bibe, tenê bi mercê ku koçber û derbiderên Efrînê vegerin ser mal û milkên xwe û Tirkiye çekdar û sivîlên ji navçeyên din anîne Efrînê ji Efrînê derbixe û mal û milkên dest danîne ser wan jî ji xelkê Efrînê re vegerîne. Herwiha ev prose jî di bin çavdêriya Encûmena Efrînê ya Sivîl de birêve biçe û gerentiya navdewletî jê re hebe. Hêzên Tirkiye dikare di dewriyên hevbeş li herêma ewle de beşdar bibe.
• Herêma ewle ji mîlîşyayên alîgirên Tirkiyê ne re qedexkirî be, lê sivîlên ji wê herêmê koçber bûne dikarin vegerin.

Mezlûm Ebdî got ku wan pêşniyarên xwe bi rêya Nûnerê Amerîka ê Taybet bo Karûbarên Sûriyê James Jeffery şandine û destnîşan kir ku wan ti mercek ji bo vekişandina leşkerên Tirkiyê ji Efrînê nedaniye û wan pirsgirêka Efrînê ji qonaxeke din re hîştiye.

Ebdî da zanîn ku stratejiya Tirkiyê kontrolkirina Girê Sipî û Kobaniyê ye û dê li wir raweste û got, di vê derbarê de jî Tirkiyê du Lîwayên Bejahî, du Lîwayên zirîpoşan û Lîwayên Komando li ser dirêjahiya 60 K.M li ser sînor belav kirine.

Fermandarê Giştî yê HSDê hişyarî da û li ser êrîşa muhtemel a Tirkiyê diyar kir: “Tirkiye derbas bibe, dê şerekî mezin rû bide. Girtina Efrînê ji Tirkiyê re ta astekê hêsan bû, ji ber ku me di wê demê de 'biryareke stratejî' standibû. Me nexwest şer fireh bibe û tenê li Efrînê be. Lê li rojhilata Firatê dê ne wiha be. Çi êrîşeke Tirkiyê çêbe, dê şerekî mezin rû bide û şer dê ji Minbicê heta Dêrikê belav be.”