Sertên besdarbûna Pêsbirka Helbestan a Arjen Arî hatin eskerekirin

PeyamaKurd – Serlêdanên ji bo 7emîn Pêşbirka Helbestan a Arjen Arî tê lidarxistin dest pê kir. Her sal ji bo bîranina helbestavanê Kurd Arjen Arî pêşbirka helbestan tê lidarxistin û kesên têne hilbijartin jî pirtûkên dosyeya wan têne çapkirin.

Mercên pêşbirkê, ji aliyê malbata Arjen Arî û Weşanên Sor ve li Şaxa Hejmar 1 a Egitîm Senê ya Amedê bi daxuyaniyeke rojnamevanî hatin ragihandin.

Nûnerê Weşanên Sor Reşo Ronahî diyar kir ku pêşbirk bi armanca xwedî derketina li wêje û zimanê kurdî ku Arjen Arî kedeke mezin pê dayê tê lidarxistin.

Endamên juriya pêşbirkê; Berken Bereh, Necla Arî (Xwişka Arjen Arî), Bêrîvan Zînzal, Fewzî Bîlge û Yeqîn H ne. Serlêdanên pêşbirkê di navbera 26ê Mijdara 2019an û 1ê Adara 2020an de têne qebûlkirin.

Şertên pêşbirkê wiha ne: 

 * Xelat dê bo berhemên bi zaravayê kurmancî hatiye nivîsandin bê dayîn.

 * Weke xelata pêşbirkê berhema ku bi ser bikeve dê ji hêla saziya ku vê pêşbirkê li dar dixe ve, ji hêla Weşanên Sor ve bê çapkirin.  

 *Her kesê ku heta niha berhemeke wî/wê ya helbestê nehatibe çapkirin dikare serî lê bide.

 * Malbata Arjen Arî û Weşanên Sor dê bi hev re kesekî/ê ku ji bo parastin û pêşvebirina ziman û edebiyata kurdî kar û xebat kiriye hilbijêrin û “xelata giramgiriyê/xelata rûmetê” bidinê.      

  * Berhemên ji hêla saziyek ve hatibe xelatkirin an di pêşbirkekê de xelat wergirtibe nikare tevlî pêşbirkê bibe.

 * Berhemên ku tevli pêşbirkê bibin divê bi alfabeya latînî hatibin nivîsandin.

 * Mafê lijneyê heye ku di dema çapkirinê de li ser berhema ku xelat wergirtiye guhertinan bike.

 * Heke jurî ti dosyeyê hêjayî xelatê nebîne dikare xelat nede.

 * Dosyeyên ku ji bo pêşbirkê bêne rêkirin divê di qabareya(hacm) pirtûkê de, 64 rûpel (4 form) bin. 

 * Dosye divê di formata A4 de, 5(pênc)nusxe û bi CDyek, USByek ku dosye tê de ye bê rêkirin ango bi awayê maîlê bête şandin. 

 * Dosyeyên ku bi kompûterê nehatî dîzaynkirin û CDyek, USByek pêve nekirî ango bi mailê nehatî şandin wê neyên nirxandin.

 * Divê di dosyeyê de nav, nîşan an mexlas hwd. ku xwediyê berhemê bide nasîn tunebe. 

 * Helbestvanên ku beşdarî pêşbirkê bibin dê kurtejiyan, navnîşan û pêdiviyên bo têkiliyê di nav zerfeke devgirtî de rêbikin. 

 * Encama pêşbirkê dê di 15ê Gulana 2020an de, yanê roja cejna zimanê kurdî bê aşkerekirin û xelat jî dê sala bê di Fûara Pirtûkan a Amedê de bête dayîn.

 * Divê dosye bi kargo yan bi posteyê, bo vê adresê bêne rêkirin: Yenişehir Mah., Ali Emiri 7. Sokak, No:22/7, Kat:1, Yenişehir/Diyarbakır (li ser navê Buroya Amedê ya Rojnameya Evrenselê)

 * Serlêdanên rû bi rû nayên qebûlkirin. 

 * Dosyeyên ku bo pêşbirkê bêne rêkirin li xwediyê wan nayêne vegerandin.

 * Endamên lijneya pêşbirka helbestê ya Arjen Arî, dê piştî encamê bizanin ka xwediyê berhemên ku dengê xwe dane wan kî ne.

 * Kesên xwedî berheman divê di navbera 26ê Mijdara 2019an û 1ê Adara 2020an de dosyeyên xwe bişînin.