Sûdanî bi aliyên Kurdistanê re civiya: Pêwîstî bi destpêkirina bilez a hewlên avakirina hikûmetê heye

PeyamaKurd - Serokwezîrê Iraqê Mihemed Şiya Sûdanî, îro Çarşemê li Hewlêrê ligel aliyên siyasî yên Kurdistanê civiya.

Sûdanî got, aramiya Herêma Kurdistanê hêzek e ji bo hemû pêkhateyên Iraqê  û diyar kir, “Hebûna parlamento û hikûmeta Herêma Kurdistanê, dibe alîkar ku aramiya siyasî bihêztir bibe.”

Serokwezîrê Iraqê pîrozbahî li beşdaran kir û ji bo bidestxistina baweriya welatiyên Herêmê hilbijartin weke qonaxeke girîng a proseya siyasî nirxşand û got, prensîpa demokrasî û pevguhertina aştiyane ya desthilatê ye ku pabendbûna xelkê Herêmê bi hilbijartinan tekez dike.

Sûdanî diyar kir, hikûmeta federal li gel hemû hêzên siyasî û Serokê Herêma Kurdistanê hewl daye ji bo temamkirina hilbijartinan û amadekirina hemû şert û mercan ji bo serkeftina proseyê.

Serokwezîrê Iraqê pêwîstiya lezkirina hevtêgihiştinê û destpêkirina pêkanîna hikûmetê û wergirtina erkên parlamentoya Herêma Kurdistanê  anî ziman û got, ji ber ku pêwîstiya welatiyan bi wergirtina bernameyên hilbijartinan heye ku rastiya jiyan û xizmetguzariya wan nîşan dide.

Sûdanî got, hebûna parlamento û hikûmeta Herêma Kurdistanê dê bibe alîkar bo bihêzkirina aramiya siyasî di hikûmeta federal û Herêmê de, ji ber ku têgihîştin û aramiya Herêmê, hêzek e bo hemû pêkhateyên civaka Iraqê.

Herwiha Sûdanî diyar kir, pirsgirêkên di navbera her du aliyan de, pêwîstiya wan bi hewlên hevbeş ên li ser asta Herêmê, hikûmeta xwecihî û federalî heye û bibîr xist, gelek dosyeyên ku ji hikûmeta berê hatine veguhestin hatine çareserkirin, hîn qonaxek maye ji bo çareserkirina dosyeyên din.