Tirkiye û Misirê Peyama Hevkariya Stratejîk Da: Ji Xezayê heta Sûriyê Hevrêziyeke Nêzîk

PeyamaKurd – Tirkiye û Misir, piştî serdemeke dirêj a sarbûna têkiliyan, bi civîneke giring a li Enqereyê, peyameke xurt a hevkariya stratejîk dan û ragihandin ku ew ê li ser gelek mijarên herêmî, bi taybetî li ser dosyeyên Xeze, Sûriye û Lîbyayê, hevrêziyeke nêzîk bikin.

Di civîna "Koma Plansaziya Hevbeş" de, ku bi serokatiya Wezîrê Derve yê Tirkiyeyê Hakan Fidan û Wezîrê Derve yê Misirê Samih Şukrî pêk hat, her du aliyan tekezî li ser xurtkirina "momemtuma erênî" ya di navbera her du welatan de kirin.

Di daxuyaniya hevbeş de hat eşkerekirin ku armanca sereke ya vê civînê, amadekirina zemînê ye ji bo civîna "Konseya Hevkariya Stratejîk a Asta Bilind" ku dê di pêşerojê de bi serokatiya serokomarên her du welatan were lidarxistin. Her du wezîran li hev kirin ku ji bo zêdekirina bazirganî û veberhênanê, astengiyên îdarî werin rakirin û têkiliyên aborî û ewlehiyê bi awayekî berfireh werin pêşxistin. Hat bibîrxistin ku sala 2025an dê bibe 100 saliya damezrandina têkiliyên dîplomatîk di navbera Tirkiye û Misirê de.

Mijara herî giring a di rojevê de, rewşa Xezeyê bû. Her du welatan bi daxuyaniyek hevbeş pesnê "hewldanên dilsoz ên Serokê Amerîkayê Donald J. Trump ji bo bidawîkirina şerê li Xezeyê" dan û tekezî li ser girîngiya hevkariya bi Amerîkayê re ji bo pêkanîna aştiya herêmî kirin. Wan piştgiriya xwe ya tam ji bo gelê Filistînê, çareseriya du-dewletî ya li ser sînorên 1967an, û lidarxistina "Konferansa Ji Nû Ve Avakirina Xezeyê" ya ku Misir dê mazûvaniya wê bike, dubare kirin.

Derbarê Sûriyeyê de, her du aliyan piştgiriya xwe ji bo pêvajoyeke siyasî ya berfireh ku yekparçeyiya axa Sûriyeyê diparêze, anîn ziman. Wan tekez kir ku divê Sûriye nebe çavkaniya gefê li ser cîranên xwe û bang li civaka navneteweyî kirin ku alîkariyên mirovî zêde bikin.

Li ser Lîbya, Sûdan û Somaliyê jî, Tirkiye û Misirê pabendbûna xwe ya bi aramî, serwerî û yekparçeyiya axa van welatan re dubare kirin û piştgiriya xwe ji bo hewldanên navneteweyî yên di bin sîwana Neteweyên Yekbûyî de anîn ziman.

Her wiha, her du welatan vîna xwe ya hevpar a ji bo veguherandina Rojhilatê Deryaya Spî bo "herêmeke aramî û geşedanê" û pêşxistina projeyên hevbeş di warê enerjî û veguhastinê de destnîşan kirin.