Wê karsazê Kurd bi riya kompaniya Elon Musk biçe ser heyvê û ala Kurdistanê bilind bike

PeyamaKurd – Hate ragihandin ku wê cara yekem di dîroka Kurdistanê de, xortekî Zaxoyî bi ala Kurdistanê biçe ser heyvê.

Dadvan Osmat xortekî 24 salî yê ji Zaxoyê ye, karsaz û sermayedar e ku niha li Dubey dijî, ew berî niha jî bi ala Kurdistanê derketibû ser çiyayê Everestê.

Dadvan Osmat ji K24ê re daye xuyakirin, wî amadekarî kirine û ew ê di sala 2025an de jî bi ala Kurdistanê biçe ser heyvê.

Osmat got, wî peymanek bi nirxê zêdetirî 2 milyon dolar bi kompanyaya karsazê Amerîkî Elon Musk re îmze kiriye, da ku sala bê wî bigihîne ser heyvê.

Dadvan wiha axivî: “Ez dixwazim bibim yekemîn Kurdê ku çûye ser heyvê. Ev dilxwaziya min a zarokatiyê ye û ez dixwazim ala Kurdistanê li ser heyvê bilind bikim.”

Hêjayî gotinê ye, Dadvan Osmat, wê çend rojan li ser heyvê bimîne û kompanyaya ku pê re girêbest îmze kiriye, dê cil û berg, xwarin, av û hemû pêdiviyên din jê re peyda bike.

Yekem car sala 1969an wekî mirov Nellie Armstrong û Boz Aldrin çûn ser heyvê ku ji wê demê ve gelek keştiyên fezayî yên din li ser rûyê heyvê daketin.