Amerîkayê nêrîna xwe ya bo hilbijartinên Rojavayê Kurdistanê eskere kir

PeyamaKurd – Çend roj berê Rêveberiya Xweser a li Rojavayê Kurdistanê piştî ku du meh berê hilbijartinên xwecihî paş xistibûn, cardin ji bo amadekariyên hilbijartinan kete tevgerê. Rêveberiyê daxwazi ji bajar û bajorên jêr kontrola xwe kir ku amadekariyên hilbijartinê temam bikin.

Li mijarê Wezareta Derve ya Amerîkayê ragihand, nerîna wan a derbarê lidarxistina hilbijartinên Herêma Bakur û Rojhilatê Sûriyê (Rojavayê Kurdistanê) nehatiye guhartin.

Wezareta Derve ya Amerîkayê eşkere kir, nerîna wan nehatiye guhartin û ew ne bi lidarxistina hilbijartinên şaredariyan yên wan navçeyan re ne. 

Hêjayî gotinê ye, beriya niha jî Amerîkayê ragihandibû, her hilbajrtineke li Bakûr û Rojhilatê Sûriyê bê pêkanîn, divê li gorî biryara 2254 ya Encûmena Ewlehiyê ya Neteweyên Yekbûyî be û niha jî şert û merc ne guncav in. 

Ev sê car in hilbijartinên Rojavayê Kurdistanê têne paşdaxistin ku biryar bû cara pêşî di meha Tebaxê de werin lidarxistin.