Brîtanyayê dest danî ser yata super a olîgarkê rûsî ku nirxê wê 38 milyon sterlîn e

PeyamaKurd – Hikûmeta Brîtanyayê ragihand ku wan dest daniye ser yateke super a olîgarkekî rûsî yê nêzîkî Pûtîn ku nirxê wê 38 milyon sterlîn e.

Hat diyarkirin ku li bendera Canary Wharf a li rojhilatê Londonê ew yata olîgarkê rûsî ku navê wî nehatiye eşkere kirin, hatiye desteserkirin.

Ew yata super a binavê ‘Phi’ ku 58,5 metre ye li ser navê Girava Saint Kitts a Giravên Karayipê tomarkirî ye û ala Maltayê li ser hebûye.

Wezîrê Gihandinê yê Brîtanyayê Grant Shapps eşkere kir, "Me îro dest danî ser yateke super a 38 milyon sterlînan. Me îkoneke ku dewlemendî û hêza Rûsyayê temsîl dike desteser kir ku ev hişyariyeke zelal e ji bo Pûtîn û alîgirên wî.”

Beriya niha di çarçoveya dorpêçên ji ber şerê Ukraynayê li ser Rûsyayê hatine sepandin de, li Îtalya û Fransayê jî yatên olîgarkên rûsî hatibûn desteserkirin ku Brîtanya cara yekem dest datîne ser yateke olîgarkekî rûsî.