Daxuyaniya yekem a eniya PKKê li ser hevdîtina DEM-Ocalan

PeyamaKurd – Yek ji rêveberên PKKê Besê Hozat jî got, “Em bi hemû hêza xwe piştgiriyê didin banga Rêberê xwe. Lê divê dewleta Tirk, hikûmeta AKP-MHPê, hikûmet û mûxalefet û dewlet bi xwe jî îradeyeke rast a çareseriyê nîşan bidin.”

Hevseroka Konseya Rêveber a KCKê Besê Hozat, hevdîtina parlamenterên DEMê Sirri Sureyya Onder û Pervîn Buldan bi Rêberê PKKê Ocalan re di 28ê Kanûnê de ji televîzyona Medya Haber a nêzî eniya PKKê re nirxand.

Hozat got, Rêber Apo dibêje, ger dewlet bi samîmî nêzîk bibe, ger hikûmet ji dil nêzîk bibe û îradeya xwe ya çareseriyê derxe holê, ew ê di vê de kedeke mezin bide, xwedî wê hêzê ye, hêza wî ya teorîk û pratîkî heye. Ew eşkere dibêje ku ew ê rola xwe di vê mijarê de bilîze."

"Ew ê bandorek giran li Tirkiyeyê bike"

Hozat diyar kir ku geşedanên li Rojhilata Navîn ditirsîne û wiha got: “Niha Projeya Rojhilata Navîn a Mezin ji aliyê hêzên hegemonîk ên kapîtalîst ve tê meşandin. Di vê wateyê de ev plan û proje li ser esasê ewlekariya Îsraîlê û ewlekirina hêza Îsraîlê ya li herêmê tê meşandin. Di vê wateyê de em ji geşedanên li Sûriyeyê jî dibînin ku Tirkiye jî di nava vê planê de ye. Hem şerê mezhebî û hem jî şerê etnîkî yê pir giran wê bandorên giran li Tirkiyê bike.”

"Devlet Bahçelî jî hinekî cudahiyê dike"

Hozat diyar kir ku Ocalan hewl dide rewşê fam bike û got, “Gelo ev gotin, ev nêzîkatî taktîk in? Şerekî taybet e? Yan haya Devlet Bahçelî ji metirsiya heyî heye û hewl dide pêşiya wê bigire? Di vê çerçoveyê de weke ku Rêbertiya me dibêje, desthilatdariya AKP-MHPê paradîgmayeke nû pêş xistiye? Ji ber vê yekê ev nîqaş pêşdikevin? Ma ew paradîgmaya ku nû li ser esasê pêkanîna vê plana xeternak, ev konsepta li ser herêmê pêk anîne, ev konsept û plana hêzên navneteweyî yên hegemonîk ava kirine?

"Pêvajoyeke çareseriyê û aştiyê nîne"

Besê Hozat wiha berdewam kir:

“Li ser vê hevdîtinê ne pêkan e ku behsa pêvajoya çareseriyê û pêvajoya aştiyê were kirin. Ji bo vê jî lîtmusa rast nêzîkbûna Îmraliyê ye. Nêzîkatiya li Rêber Apo ye. Li Îmraliyê şert û mercên tecrîd û îşkenceyê hê jî dewam dikin. Êrîşên qirkirinê yên li ser gelê Kurd ranaweste. Lewma em nikarin vê pêvajoyê weke pêvajoya çareserî û aştiyê bi nav bikin. Pratîk wê vê yekê nîşan bide. Di vê wateyê de bêyî avêtina gavên cidî yên pratîkî ev pêvajo nayê binavkirin. Niha ev nîqaş nayên diyarkirin."

Hozat got, “Êrîş, êrîşên qirkirinê li her derê pir dijwar didomin. Zihniyet û hikûmeteke ku li dijî xweparastina Kurdan a li Rojava derdikeve, hewl dide Rêveberiya Xweser tasfiye bike, dixwaze Kurdan qir bike, wê çawa pirsgirêka Kurd li Tirkiyeyê li ser bingeheke demokratîk çareser bike? Çawa dikare bi rastî bi samîmî nêzî çareseriya demokratîk a pirsgirêka Kurd bibe? Ev pirsek pir mezin e."

Hozat got, “Tiştên ku her tim îfade dikin kuştin, wêranî, êrîş, şer in. Ji xeynî vê, tiştek wan tune ku nîşan bidin. Çi ji hev cuda tê fêmkirin an jî dixwazin têgihîştina çi biafirînin? Biratiya Tirk-Kurdan. Di devê xwe de kirine benîşt.”

'Em li pişt vîna çareseriyê ya Ocalan in'

Besê Hozat got, “Em bi hemû hêza xwe piştgiriyê didin bangên Rêberê xwe, em li pişt vîna çareseriyê ya ku Rêbertiya xwe daye, em piştgiriyê didin vê îradeyê. Ji ber vê yekê di çareseriya demokratîk a pirsgirêka Kurd de muzakerekarê sereke Rêber Apo ye. Me her tim ev yek gotiye, em dîsa û dîsa dibêjin. Lê divê dewleta Tirk, hikûmeta AKP-MHPê, hikûmet û mûxalefet û dewlet bi xwe jî îradeyeke rast a çareseriyê nîşan bidin.”