Demîrtas: Divê HDP û hemû hêzên din ji bo astiyê zêdetir însiyatîf werbigirin

PeyamaKurd –  Di nivîseka ji aliyê malpera Medyascope ve hat belavkirin de, Hevserokê berê yê HDPê Selahattîn Demîrtaş, behsa rewşa siyasî û civakî ya Tirkiyê kir. Demîrtaş dibêje, divê HDP û hemû hêzên din ên demokrasiyê, ji bo aştiyê zêdetir însiyatîf werbigirin û nexşerêyekê “ji bo derketina ji vê krîzê diyar bikin.” Demîrtaş dide zanîn: “Divê HDP ziman û şêwazê siyaseta xwe jî li gor van armancan rêk bixe.”

Selahattîn Demîrtaş, rexneyên tund li desthilata Tirkiyê girt û destnîşan kir: “Ji bilî aştî û pêkvêjiyanê, bijardeyek din li ber me nîne.” û bûyera li Garê jî wek nimûneyeke trajedîk ji bo bibîrxistina girîngiya aştiyê binav kir.

Demîrtaş da zanîn, lêgerîneke desthilata Tirkiyê ji bo aştiyê nîne û “tiştek nîne ku desthilat ji bo parastina kursî û bidestxistina dengan neke” û diyar dike ku nabe civak xwe radestî vê siyasetê bike û “pêdivî bi îradeyeke cidî heye.”

Demîrtaş di berdewamiya nivîsa xwe de dibêje, berpirsyariyeke mezin a opozisyonê heye ku aştiya navxwe pêk bîne û tekez dike: “Gelek hewlên HDPê hene di vê mijarê de, lê divê rêveberiya HDPê şêwazê siyaset û zimanê xwe jî li gor van armancan rêk bixe. Zelal e ku girtina HDPê ti sûdek ji bo aştiyê nîne. Hêvîdar im ji bo hesabên erzan nekevin nav xeletiyeke wiha.”

Hevserokê Berê yê HDPê eşkere dike, li şûna çek û tundûtûjiyê, divê siyaseta demokratîk wek rêbaza çareseriyê esas bê girtin û diyar dike: “Divê helwest û ziman jî li gor wê yekê bê rêkxistin û cîbicîkirin. Eger em bikarin vê yekê bikin, ya piştî wê ne zehmet e.”

Hevserokê Berê yê HDPê Selahattîn Demîrtaş, ji sala 2016an ve li bajarê Edîrnê, di girtîgehê de ye.