Ehmed: Yên gule berdane wê derkevin pês dadgehê û cezayê xwe wergirin

PeyamaKurd –  Wezîrê Navxwe yê Herêma Kurdistanê Rêber Ehmed, serdana 2 polîsên birîndar ên li Şeqlawe kir û da zanîn, yên ku gule berdane, wê derkevin pêş dadgehê û cezayê xwe wergirin.

Wezîrê Navxwe Rêber Ehmed, serdana nexwaşxaneya Şeqlawa ya polîsên birîndar lê ne kir û daxuyaniyek ji çapemeniyê re da û got, serdana polîsan kiriye ku ji nêzîk ve rewşa wan bipirse û hêviya çareseriyê ji wan re xwestiye.

Herwaha eşkere kir, Serokê Hikûmeta Herêma Kurdistanê Mesrûr Barzanî, gelek giringî daye vê dosyayê û gotiye çi pêwîst be ji bo çareseriya wan polîsên birîndar bila bê kirin û bê bicîhanîn.

Wezîrê Navxwe destnîşan kir, ew çekdarên ku gule berdane û hîn nehatine girtin, pêwîst e bixwe xwe radestî polîsan bikin, ji ber wê di dawiyê her bên girtinê.

Rêber Ehmed da zanîn, wê dûvçûna yasayî ji bo vî tawanî bê kirin û cezayê herî tund dê ji tewanbaran re bê dayîn û got, divê bê zanîn ew ê ku êrîş dike ser polîsan, di dema li ser kar de tawanê herî mezin kiriye.

Rêber Ehmed daxwaz ji rû spî û kesayetên maqûl ên deverê jî kir, piştevaniyê ji wan kesên ku gule berdane re nekin, ji ber derveyî çûna pêş dadgehê ti rêyeke din li pêş wan tine.