Li Semawe bombeyek bi karwaneke Hevpeymaniya Navdewletî de teqiya

PeyamaKurd – Bombeyeke vedayî li ser rêya navdewletî ya Semawe, bi karwaneke Hevpeymaniya Navdewletî ya li dijî DAIŞê de teqiya.

Li gor çavkaniyekî ewlehiyê yê Iraqê diyar kir; li ser rêya navdewletî ya Semawe bombeyeke vedayî bi karwaneke Hevpeymaniya Navdewletî ya li dijî DAIŞê de teqiya û di encamê de tenê zerarên madî derketin holê.

Komeke çekdar a bi navê "Qasim El Cebarîn" berpirsyariya wê êrîşê girt ser xwe.

Ev êrîş piştî Rêberê Esayîb Qeys Xez'elî do êvarî diyarkiribû; êrîşkirina ser karwanên serbazî û serbazgehên Amerîkayê "armanceke rewa" ye û gotibû: “Êrîşkirina ser balyozxaneyê, ji sûdê zêdetir zerarê dide.”

Komeke çekdar a bi navê Eshab El Kehf jî di daxuyaniyekê de ji komên Muqaweme daxwaz kiribû; li her derê, karwanên serbazî û serbazgehên Artêşa Amerîka û Hevpeymanan bikin armanc.