Li Wanê dijî tîma saredariyê êrîsa çekdarî: 2 kesan can da

PeyamaKurd – Li navçeya Qerqelî (Ozalp) a bajarê Wanê yê Bakurê Kurdistanê, li dijî wesayîteke şaredariyê êrîşeke çekdarî pêk hat ku di encama êrîşê de karmendekî şaredariyê û kesekî din hatin kuştin.

Parêzgariya Wanê derbarê bûyerê de bi daxuyaniyekê ragihand ku bûyer îro 14ê Gulanê dema tîma alîkariyê ya pandemiya koronayê ji taxa Egrîbelen a karantînakirî vedigeriya, ji aliyê kesên di nav otomobîleke li pişt wan ve rastî êrîşeke çekdarî hatiye.

Hat diyarkirin ku êrîş li demjimêr dor 12:00an pêk hatiye û êrîşkaran bi çekên luledirêj êrîş kirine û piştre ji cihê bûyerê reviyane.

Parêzgariyê da xuyakirin ku karmendekî şaredariyê û kesekî sivîl di encama wê êrîşê de can dane û karmendekî din ê şaredariyê jî birîndar bûye ku ew rakirine Nexweşxaneya Dewletê ya Ozalpê.

Di daxuyaniyê de hat gotin ku piştî bûyerê operasyoneke berfireh hatiye destpêkirin û derbarê bûyerê de jî lêpirsîn dane destpêkirin.

Di daxuyaniya parêzgariyê de berpirsên êrîşê nehatine eşkerekirin, lê medya Tirkiyê bi vê êrîşê PKKê tawanbar dike.