Penaberên Kurd ên deportî Sûriyê kiribûn bi alîkariya ofîsa Serokwezîr vedigerin

PeyamaKurd – Penaberên Kurd ku ji Tirkiyê deportî Sûriyê hatibûn kirin, bi alîkariya ofîsa Serokwezîrê Herêma Kurdistanê Mesrûr Barzanî, sibê vedigerin Herêma Kurdistanê.

Çavkaniyekî agahdarê dosyeya penaberan daye zanîn; ofîsa Serokwezîrê Herêma Kurdistanê li ser xetê bû ji bo çareseriya vê kêşeyê û di encamê de karîne vê kêşeyê çareser bikin û wan penaberên Kurd vegerînin Herêma Kurdistanê.

Çavkaniyê diyar kiriye; Fermangeha Pêwendiyên Karên Derve yên Hikûmeta Herêma Kurdistanê, rêkarên pêwîst pêk anîne û hewldanên xwe zêde kirine ji bo gihîştina çareseriya kêşeya wan penaberan.

Hejmara penaberan 57 kes in û xelkê Herêma Kurdistanê ne, piştî ku li Tirkiyê hatibûn desteserkirin, ji ber ku gotibûn ji Sûriyê reviyane, rayedarên Tirkiyê ew deportî Sûriyê kiribûn.

Penaberên Kurd li devera Ezaz a ser bi parêzgeha Helebê ya li bakurê Sûriyê û li ser sînorê Tirkiyê desteserkirî ne û di bin desthilata kom û milîsên çekdar de ne, ku girêdayî Tirkiyê ne û wê deverê îdare dikin.

Ezaz yekane pêgeha wan çekdaran e ku di van 11 salên borî de her du beşên bakurê rojhilatê Sûriyê û rojavayê wê ji hev vediqetîne.