Sanda Amerîkî ji bo destpêkirina danûstandinên Kurdî-Kurdî li Rojavayê Kurdistanê ye

PeyamaKurd – Hat ragihandin ku ji bo ji nû ve destpêkirina danûstandinên Kurdî-Kurdî li Rojavayê Kurdistanê, şandeke Wezareta Derve ya Amerîkayê ya bi serokatiya Alîkarê Wezîrê Derve Joey Hood gihîştiye bajarê Qamişlo û wê şanda Amerîkayê bi her du aliyên ENKS û PYDê re bicive.

Li gorî zanyariyan Joey Hood doh 26ê Tebaxê tevî şandeke dîplomatîk gihîştiye bajarê Qamişlo û wê ligel Encûmena Niştîmanîya Kurdî li Sûriyê (ENKS) û Partiyên Yekîtiya Niştîmanî ya Kurd (PYNK) a bi ser PYDê ve ye re hevdîtinan pêk bîne.

Wê Alîkarê Wezîrê Derve yê Amerîkayê ji bo her du aliyên Kurdî ji bo rêkeftina dawî nêzîkî hev bike danûstandinan bike û hewla rakirina astengiyên li pêşiya danûstandinan bide.

Çav li rê ye şanda Amerîkî bi pêkhateyên herêmê û serokên encûmenên sivîl ên parêzgehên Reqa û Dêrazorê re jî hevdîtinan bike.

Hêjayî gotinê ye, ev zêdetirî salekê ye bi destpêşxeriya Amerîkayê, danûstandinên aliyên Kurdî li Rojavayê Kurdistanê di navbera ENKS û PYNKê de destpê kirine.

Her du aliyan herî dawî li ser bingeha Rêkeftina Duhokê ya Cotmeha 2014an a derbarê desthilat, rêveberî, parastin û berevaniyê de li hev kiribûn, lê paşê careke din danûstandin bêyî ku bigihin encamekê rawestiyabûn.

Di wê navê de gelek ofîs û nûnertiyên ENKSê rastî êrîşan hatibûn, hejmarek endam û rêveberên wê jî ji aliyê Asayîşa Rojava ya bi ser PYDê ve hatibûn girtin ku ev jî ji bo ji nû ve destpêkirina danûstandinan bûbû asteng.