Serok Barzanî gihîst Cizîrê û gotarek pêskês kir

PeyamaKurd – Serok Mesûd Barzanî, îro gihîşt navçeya Cizîrê Botan a Şirnexê û beşdarî "4emîn Sempozyûma Navneteweyî ya Melayê Cizîrî" bû. Serdana Serok Barzanî ya bo Cizîra Botan, ji aliyê xelkê herêmê, rayedar û akademîsyenan ve bi eleqeyeke mezin hat pêşwazîkirin.

Beşdariyeke berfireh a navneteweyî
Sempozyûma ku du rojan didome, bûye navenda kombûna rewşenbîrî. Di çalakiyê de 111 akademîsyenên ji 23 zanîngehên Bakurê Kurdistanê û Tirkiyeyê û 16 beşdarên navneteweyî yên ji Herêma Kurdistanê, Rojhilatê Kurdistanê û Îran, Rojavayê Kurdistanê û Sûriye û Almanyayê amade ne. Di nava heyeta Serok Barzanî de Parêzgarê Hewlêrê Umêd Xoşnaw jî cih girt.

Peyamên Serok Barzanî: "Îro rojeke gelekî xweş e"
Serok Mesûd Barzanî di sempozyûmê de gotarek pêşkêş kir û behsa girîngiya Melayê Cizîrî û pêwendiya wî ya bi Tekyeya Barzan re kir.

Xalên girîng ên ji axaftina Serok Barzanî:

• Melayê Cizîrî stêrkeke geş e û qet venamire. Keremeke mezin e ku Melayê Cizîrî li vir hatiye dinyayê."

• "Li Tekyeya Barzan her tim helbestên Melayê Cizîrî dihatin xwendin.

Serok Barzanî hestên xwe weha derbirrîn:

"Îro rojeke gelekî xweş a jiyana min e. Ez spasiya xelkê Cizîrê û Zanîngeha Şirnexê dikim."

Pêşwaziya DEM Partiyê: "Ew xwediyê malê ye"
Berdevka DEM Partiyê Ayşegul Doganê jî der barê serdana Serok Barzanî de daxuyaniyeke erênî da Rûdawê û got:
"Em bi hatina wî gelekî kêfxweş in. Ew xwediyê malê ye. Em hêvî dikin ev serdan bibe wesîleya aştiyê. Me dixwest em li şaredariya me ya Cizîrê jî wî pêşwazî bikin."