SOHR: Di zindanên rejîma Esed de kustina 62 hezar kesan hate belgekirin

 PeyamaKurd – Çavdêriya Mafên Mirovan a Sûriyê (SOHR) rapora kuştinên di girtîgehên rejîma berê ya Sûriyê de eşkere kir û ragihand, ji destpêka şerê navxwe yê 2011an ve nêzî 62 hezar kes di zindanên Sûriyê de hatine kuştin.

Li gorî amarên SOHRê, di sala 2024an de, 1200 kes di girtîgeh û zindanên rejîma berê de, di bin îşkenceyê de hatine kuştin û hejmara giştî ya kuştiyan jî ji destpêka şerê li Sûriyeyê ve gihîştiye 61 hezar û 925 kesan.

SOHRê daye zanîn, li gorî belgeyên fermî tenê di 2024an de hezar û 200 welatî di bin îşkence û xemsariya tenduristî de di girtîgeh û zindanên rejîma Beşar Esed de hatine kuştin.

Li gorî raporê: “Ev belgeyên fermî yên ku ji navendên binçavkirinê hatine derxistin, asta tawanên hovane û binpêkirinên giran ên ku girtî rastî wan dihatin, piştrast dikin.”

SOHRê diyar kir ku divê berpirsên van tawanan bên darizandin û bigihin sizayên xwe yên yasayî.

Li gorî Komeleya Girtî û Windayan a Girtîgeha Sednayayê, zêdetirî 30 hezar girtî di navbera salên 2011 û 2018’an de li zîndanê yan hatine bidarvekirin, yan jî ji ber îşkenceyan û nebûna lênerîna bijîşkî û birçîbûnê mirine.

Komîteya Navdewletî ya Windayan eşkere kiriye ku li seranserê Sûriyeyê 66 gorên bi komî hene ku kesên dijberên rêjîma Beşar Esed tê de hatine veşartin.