Sûdanî: Em rê nadin ewlekarî û aramiya Iraqê xerab bibe

PeyamaKurd – Serokwezîrê Iraqê Mihemed Şîa Sûdanî derbarê rewşa Rojhilata Navîn de hişyarî da û diyar kir ku ew rê nadin ewlehî û aramiya Iraqê xerab bibe.

Li gor daxuyaniya ku ji Ofîsa Çapemeniyê ya Serokwezîrtiyê hat dayîn, Muhammed Şiya Sûdanî beşdarî nimêja hevpar a ku li Dêra Keldanî ya Saint Joseph a li navenda Bexdayê hat kirin da ku êrîşên li Xezzeyê bi dawî bibin û li herêmê îstiqrar bê kirin.

Sûdanî di daxuyaniya xwe ya li wir de wiha got: “Armanckirin û kuştinên komî di aramî û bêdengiya hemû civaka navneteweyî de tên kirin. Hikûmeta Îsraîl a dagirker hemû peyman, nirx û qanûnên navneteweyî binpê dike.”

Herwiha got, "Pêdiviya me bi axaftina exlaqî ji her demê zêdetir heye. Em tekezî li ser helwesta Hikûmeta Iraqê li hember wan bûyerên ku herêmê bi şer û pevçûnan dixwin, tekez dikin, ev helwest ji helwesta Iraqiyan di hemû civak û aliyan de tê.”

Sûdanî peyama hevxemiya xwe bi Filistînê re da û bal kişand ser parastina aramiya Iraqê û got, “Em rê nadin ti aliyek ewlehiya Iraqê têxe metirsiyê.”