Tirkiyeyê, li ser nefta Herêma Kurdistanê, daxuyanî da

PeyamaKurd- Wezîrê Enerjî û Çavkaniyên Siruştî yê Tirkiyeyê Fatih Donmez, li ser doza di navbera Tirkiye û Iraqê de ya li ber Dadgeha Sizayê Giran a Parîsê got, "Tu dorpêçên yekalî tunene.”

Fatih Donmez, biryara Dadgeha Tahkîmê ya Navneteweyî ya di derbarê nakokiyên navbera Tirkiye û Iraqê de bi bîr xist û wiha got: "Hat ragihandin ku 1,4 milyar dolar siza hatiye birîn. Çima me ev siza girt?

Di mareke bi vî rengî de tu siza tuneye. Raporteke berfireh heye û têkildarî wê hin dorpêç jî hene. Sizayên yekalî tunene. Ji 5 mijarên ku Iraqê îdîa kiribû 4 jê hatin redkirin, 1 jî hat qebûlkirin. Daxwazên me hebûn. Ji 6 mijaran 5 daxwazên me hatin qebûlkirin, 1 jî hatin redkirin. Li ser vê yekê ev siza niha ji aliyê hevalên me yên parêzer ve tên nirxandin. Li gorî vê raporta Dadgeha Tahkîmê ya Navneteweyî û li gorî hiqûqa navneteweyî, em ê roleke çêker bilîzin. Ev jî dê bi demê re xuya bibe.”

Wezîr Donmez diyar kir ku ji bo Tirkiyeyê dayîna 1,4 milyar dolar siza, ne mijara gotinê ye û axaftina xwe wiha berdewam kir:

"Gelo dozeke din a bi hincetên enerjiyê yên bi vî rengî di derbarê Tirkiyeyê de li Dadgeha Tahkîmê ya Navneteweyî heye? Di mijarên din de doz hene, lê mijarên din hene ku hikûmet alîgirê wan e."

Doza Tahkîmê

Iraqê, bi hinceta ku Tirkiye ji sala 2013yan vir ve rasterast bi Herêma Kurdistanê re bazirganiya petrolê dike, peymana sala 1973yan a di navbera Bexda û Enqereyê de binpê kiriye, li pêşberî Navenda Tahkîman a Odeya Bazirganî ya Navneteweyî (ICC) ku navenda wê li Parîsê ye, li dijî Tirkiyeyê doz vekir.

Wezareta Petrolê ya Iraqê ragihand ku dadgehê roja pêncşema borî biryar da ku Tirkiye bi 1.4 milyar dolar tazmînat mehkûm kiriye û sewqiyata ji Herêma Kurdistanê ji bo bendera Ceyhanê hatiye rawestandin.

Ji Enqereyê, ravekirineke cuda çêbû

Lê Wezareta Enerjî û Çavkaniyên Xwezayî ya Tirkiyeyê ragihand ku di dosyeya navborî de 4 daxwazên Iraqê hatine redkirin û piraniya daxwazên Tirkiyeyê hatine qebûlkirin û Iraqê ferman daye ku Iraq qerebû bide Tirkiyeyê.

Di daxuyaniya wezaretê de hat diyarkirin ku ev doz rastî nakokiyên mafên rêveberiya petrolê yên di navbera Hikûmeta Navendî ya Iraqê û Hikûmeta Herêma Kurdistanê de ye ku di heman demê de yekîneyeke destûrî ya Iraqê ye.