Wezîrê Tirk bersiva nebûna anonsên Kurdî da

PeyamaKurd – Wezîrê Gihandin û Binesaziyê yê Tirkiyê Adil Karaismailoglu, li ser pirsnameya Parlamentera HDPê ya Mêrdînê Ebru Gunay a derbarê sedema nebûna anonsên bi zimanê Kurdî li otogar û balafirxaneyan bersiv da.

Wezîrê Tirk di bersiva xwe de, bal kişandiye ser Rêxistina Balafirvaniya Sivîl a Navnetewî û gotiye, ji ber ku di zimanên hatine diyarkirin de Îngilîzî, Fransî, Îspanyolî, Rûsî, Erebî û Çînî heye ew jî li gorî wê rêxistinê tevdigerin û bi Kurdî anonsan nadin.

Herwiha wezîrê tirk diyar kiriye ku ew li gorî rêzikên navnetewî agahîyên şêwirmendiyê û anonsên xwe bi Îngilîzî û Tirkî didin.

Hêjayî gotinê ye, li Tirkiye û Bakurê Kurdistanê li gorî serjimarên nefermî bêhtirî 20 milyon Kurd dijîn, lê bi zimanê Kurdî xizmet bo rêwiyan li otogar û balafirxaneyan nayê dayîn. Lê belê berevajî gotinên wezîrê tirk, bi zimanê erebî û çend zimanên din ew xizmet têne dayîn ku li Tirkiyê hejmara wan kesan li gorî Kurdan gelekî kêm in.