3 sal cezayê girtîgehê li Aysel Tugluk hat birîn

PeyamaKurd – Parlamentera berê ya HDPê Aysel Tûglûk di doza ku dihat darizandin de 3 sal cezayê girtîgehê lê hat birîn.

Rûniştina dawî ya doza ku parlementera berê ya HDP'ê Aysel Tûglûk bi îdiaya "propagandaya rêxistina terorê kiriye" tê darizandin, di 14ê Çileyê de li 6emîn Dadgeha Cezayê Giran a Amedê hat dîtin.

Li gorî nûçeya Ajansa Mezopotamyayê (MA) Aysel Tûglûk ji ber rewşa xwe ya tenduristiyê beşdarî rûniştinê nebû, parêzerê wê Serdar Çelebî jî amade bû.

Dozgeriyê bi îdiaya “propagandaya rêxistina terorê kiriye” xwest Aysel Tûglûk bê cezakirin. Heyeta dadgehê bi hinceta “propagandaya rêxistina terorê kiriye” 3 sal cezayê girtîgehê li Aysel Tugluk birî.

Dadgehê ceza kêm nekir û biryar da ku ne hewce ye ragihandina biryarê were taloqkirin an jî taloqkirin.

Aysel Tûglûk a ku di sala 2016an de ji ber xebatên wê yên DTKê hat girtin, bi îdîaya "Rêveberiya rêxistinê ye" 10 sal cezayê girtîgehê lê hat birîn.

Aysel Tûglûk a li girtîgehê bi nexweşiya demansê ketibû, di 27ê Cotmeha 2022an de ji Girtîgeha Tîpa F a Jimare 1 a Kandirayê ya Kocaeliyê bi rapora ku ji aliyê Saziya Tiba Edlî ve hatibû amadekirin û gotibû "Tenduristiya wê ne guncaw e ku li girtîgehê bimîne" hat berdan.