Damari: Li cîhanê hejmara kesên ji cih û warê xwe bûne gihîstiye 48 milyon kesan

PeyamaKurd – Encûmena Giştî ya Neteweyên Yekbûyî civiya û di civînê de diyar kir,  ji ber şer û pevçûnên çekdarî hejmara kesên ji cih û warê xwe bûne, gihîştiye 48 milyon kesan.

Raportora Taybet bo Awareyan a Neteweyên Yekbûyî Cecilia Jimenez Damari di civînê de dazanîn: “Hejmara kesên ku ji ber pevçûn û tundiya çekdarî li seranserê cîhanê aware bûne, gihîşt 48 milyon kesan û ev hejmar heta niha hejmara herî bilind e.”

Cecilia Jimenez Damari eşkere kir: “Di vê rewşê de ku pevçûna çekdarî û belavbûna tundiyê tevlihev bûye, pêkanîna rêzgirtina li mafên navdewletî yên mirovî û rêzgirtina li mafên mirovan her ku diçe dijwartir dibe.”

Damari destnîşan kir, ji ber şer û pevçûnên li piraniya cîhanê û karesatên sirûştî ku xelkê ji cih û warên wan dikin, dibe ku rewşê xerabtir bikin.