Di hilbijartinên Parlamentoya Iraqê de yekem car 2 Kurdên Kakeyî hatin hilbijartin

PeyamaKurd – Di hilbijartinên Parlamentoya Iraqê de, yekem car 2 namzedên Kurdên Kakeyî ku her du jî jin in, hatin hilbijartin. Yek ji wan namzedan dibêje: “Em nûnerên hemû Kurdistanê ne, lê vegerandina aramiyê bo sînorê Kakeyînişîn, dibe karê me yê sereke.”

Di hilbijartina pêşwext a Parlamentoya Iraqê de, 2 namzedên Kakeyî ku her du jin in û li navçeyên Kurdistanî yên Derveyî Îdareya Herêma Kurdistanê ne, serkeftin bidest xistin.

Namzeda Partiya Demokrat a Kurdistanê (PDK) li Bazneya 2 ya Kerkûkê Necwe Hemîd Kakeyî, 10 hezar û 19 deng bidest xist û bû parlamenter, herwiha li Bazneya 1 a Parêzgeha Neynewa Ehlam Remezan ji Hevpeymaniya Kurdistan (YNK) bi 4 hezar û 910 dengan bû parlamenter.

Namzeda Derçûyî ya Bazneya Yek a Kerkûkê ji Lîsteya PDKê Necwa Hemîd Kakeyî daye zanîn, yekem car e 2 nûnerên Kakeyiyan li Parlamentoya Iraqê wê hebin, lê ew nûnertiya hemû Kurdistanê dikin ne tenê ya Kakeyiyan.

Necwe Kakeyî eşkere kiriye: “Ez xelka sînorê Daqûqê me, li wê derê jî ji ber rewşa xerab a emnî sê gundên Kakeyiyan hatine valakirin. Karê me yê sereke vegerandina aramiyê ye ji bo wan navçeyan.”

Di Gera Yekem a Parlamentoya Iraqê de, tu nûnerekî Kakeyiyan nebû, lê li gerên dû, sê û çar, nûnerekî wan li parlamento hebû, di gera pêncem de jî dû nûnerên wan dibin ku her du jin in.