Graham û Erdogan civiyan: Tirkiye hevpeymaneke gelekî girîng e!

PeyamaKurd – Senatorê Amerîkayê Lindsey Graham, bi Serokomarê Tirkiyê Recep Tayyip Erdogan ku ji bo Civata Giştî ya Neteweyên Yekbûyî li Amerîkayê ye re hevdîtinek pêk anî û got, “Tirkiye ne tenê li Sûriyê ji bo tevahiya herêmê hevpeymaneke gelekî girîng e”.

Piştî hevdîtina ku Erdogan û Wezîrê Derve yê Tirkiyê Mevlut Çavuşoglu beşdarî kirin, Graham da xuyakirin ku ew di hevdîtinê de li ser pêşhatên Sûriyê û bernameya balafirên F-35an axivî ne.

Senator Graham got ku di hewlên bo yekgirtina Sûriyê de û di hewlên bo serneketina Esed de piştgiriya Tirkiyê jêneger e û got, “Ya herî girîng jî Tirkiye rê li ber qetilkirina 4 milyon şêniyên Idlibê digire.”

Lindsey Graham piştî hevdîtinê pesnê Tirkiyê da û diyar kir, “Ez ji bo pêwendiyeke stratejîk ya pêşketîtir bi Tirkiyê re bi hêvî me. Herwiha vegera Tirkiyê bo bernameya F-35an û pêkanîna êkeftina bazirganiya serbest pir girîng e. Tirkiye ne tenê li Sûriyê ji bo tevahiya herêmê hevpeymaneke gelekî girîng e.”