Hîzbullaha Iraqê: Em ê bersiveke dijwar bidin êrîsên esmanî yên Amerîkayê

PeyamaKurd – Berpirsê Ewlehiyê yê Ketayîbê Hîzbullaha Iraqê Ebû Elî Eskerî di daxuyaniyeke rojnamevanî de diyar kir, ew ê bersiveke dijwar bidin êrîşên esmanî yên Amerîkayê.

Ebû Elî Eskerî da zanîn: “Şerkirina li dijî artêşa dagirkeran, biryareke bi temamî Iraqî ye û ti aliyekî derve destwerdanê tê de nake û heta vekişîna serbazê herî dawî yê hêzên dagirkeran ji welatê me, veger ji biryarê tune ye.”

Eskerî destnîşan kir: “Armancgirtina nûnerên dîplomasiyê ji aliyê Bereya Muqawemeya Iraqê ve karekî redkirî ye û biryara Iraqê ew e ku nabe bi ti awayî êrîşî nûnertiyên welatan were kirin.”

Di dawiya daxuyaniyê de eşkere kiriye: “Divê dijmin ji peyamê fêm bike, bersivdan dê gelek dijwar be û em ê êrîşên xwe li ser çend xalan berfireh bikin ku nehatibe xeyala wan jî, herwiha em ê pîvana gurza xwe bo qonaxekê zêde bikin ku veger jê nîne.”