Kerkûkî: Bila Kurdekî bê teref bibe waliyê Kerkûkê

PeyamaKurd- Temsîlkarê PDK ê Dr. Kemal Kerkûkî ragihand ku ew bi terefên din re dixebitin da halê bajarê Kerkûkê normal bibe û heya hilbijartinê Kurdekî bê teref bibe waliyê Kerkûkê lê divê hemû partiyên Kurd li serê hemfikir bin. Dr. Kerkûkî weha got:

“Niha halê Kerkûkê zahf xerab e. Di 16 cotmehê de grûbekî îxanetkar Kerkûkê bi erzanî firot. Niha di bajêr de îstîqrar û aramî nemaye. Mirov tên revandin û tên kuştin. Kerkûk bûye baregeheka leşkerî. 3 tûxayên bi ser polîsên federal ve, tûxayekî hêza antî-terorê,12 yekîneyên Haşdî Şabî û 12 yekîneyên eşîran hene. Em weke PDK dixebitin da halê bajêre bibe normal û divê kesên bûne sedema bûyerên 16 ê cotmehê bên cezakirin.”

Kerkûkî got ku divê halê Kerkûkê li gor xala 140 ya qanûna esasî bê normalkirin. Nûfûsa bajêr bê tesbîtkirin û bo dahatûya wê referandûm bêkirin. Divê hêzên leşkerî ji Kerkûkê bên derxistin û dewrê hêzên cî bêkirin, her wekî salên berya 2014an ku pêşmerge û artêşa Iraqê ewlekariya bajêr birêve bibin.

Kerkûkî bo parêzgerê demkî got ku dibe ne ji PDKê an ji YNKê be. Dibe Kurdekî bê teref be.