Li Akre agir bi dibistaneke koçberên Rojavayê Kurdistanê ket

PeyamaKurd – Li qezaya Akrê ya Herêma Kurdistanê, agir bi dibistaneke koçberên Rojavayê Kurdistanê ket û di encamê de beşek ji dibistanê şewitî, lê ti zirarên canî çênebûn.

Li gor zanyariyan, êvara roja Pêncşemê agir bi wê dibistana taybet a xwendekarên koçberên Rojavayê Kurdistanê ketiye.

Berdevkê Rêveberiya Berevaniya Sivîl a Duhokê Bêwar Ebdulezîz diyar kiriye: “Dibistana ku agir pê ketiye, li Kampa Kela Akrê ye û ya xwenekarên koçberên Rojavayê Kurdistanê ye.”

Bêwar Ebdulezîz eşkere kir: “Di şewatê de tenê odeya mamosteyan şewitiye û kes jî tê de nebûye, lewra ti zirarên canî nînin.”

Mamosteyekî wê dibistanê ji Berevaniya Sivîl a Akrê re gotiye, sedema derketina agir kontakta elektrîkê bûye, lê belê Berdevkê Berevaniya Sivîl a Duhokê dibêje, wan komîteyeke lêkolînê pêk aniye, da ku sedema bûyerê diyar bikin û paşê ew dê encamên lêkolîna xwe radestî Perwerdeya Akrê bikin.

Nêzîkî 240 hezar koçberên Rojavayê Kurdistanê di nava 10 kampên Herêma Kurdistanê de dijîn.