Lûtkeya NATO îro li Washingtonê destpê dike

PeyamaKurd – Serokên 32 welatên endamên NATOyê îro li Washingtonê ji bo lûtkeya ku ji bo pîrozkirina 75emîn salvegera damezrandina NATOyê were lidarxistin, tên ba hev.

Erdogan jî wê beşdarî Lûtkeya NATOyê bibe

Ji bilî senaryoyên serkeftina Trump di hilbijartinên serokatiya Amerîkayê de, rasterast şandina çekan a Hevpeymaniyê bo Ukraynayê jî di rojevê de ye.

Di civînên sê rojî yên ku îro destpê dikin de, wê rêyên gihandina alîkariyên bi bandortir ji Ukraynayê re jî were xwestin.

Li pişt deriyên girtî, awayên amadekirina NATOyê ji bo serdema duyemîn a Donald Trump wê werin nîqaşkirin. Bi taybetî piştî nîqaşên televizyonê yên vê dawiyê, baweriya ku Demokrat Joe Biden wê di hilbijartinên Mijdarê de li Dewletên Yekbûyî yên Amerîkayê (DYA) bi ser bikeve kêm bûye.

Lûtkeya Serokomarê Tirkiyê Recep Tayyîp Erdogan wê di 9ê Tîrmehê de bi bernameya bîranîna salvegera 75emîn a NATOyê destpê bike. Tê payîn ku Erdogan ji bilî hevdîtinên bi endamên îtîfaqê re çend hevdîtinên dualî pêk bîne. Herwiha tê şopandin ka wê Erdogan bi Serokê DYAyê Joe Biden re hevdîtinê bike yan na.

Amadekariyên ji bo serdema duyemîn a Trump

Tê diyarkirin ku lîderên Ewropî ev demeke dirêj e ku ji bo amadekirina tifaqê ji bo serdema duyemîn a Trump nîqaşên cidî dikin.

Trump, ku ji NATOyê bi guman e, berê gotibû ku dibe ku ew hin welatên endam li dijî Rûsyayê neparêzin.

Trump herwiha li dijî alîkariyên çekan ên ku ji Ukraynayê re tên şandin jî nerazî ye. Bi ser de jî, partiya wî, Komarparêz, pesendkirina pakêta alîkariyê ji bo Ukraynayê di Kongreyê de di mehên dawî de dereng xist, di dema ku artêşa Rûsî li eniyê pêşde çû.

Di dema nîqaşa serokatiyê de, dema Biden pirsa "Hûn ê ji NATOyê derkevin?", Trump milên xwe hejand, yanî "ne diyar e".