Medya fermî ya Îranê kustina 2 fermandarên polîs pistrast kir

PeyamaKurd – Hat ragihandin ku li eyaleta Sîstan û Belûçistanê 2 fermandarên payebilind ên polîsê Îranê hatine kuştin.

Ajansa nûçeyan a Tasnîm a bi ser Pasdarên Îranê ve, bi awayekî fermî kuştina du fermandarên polîs ên bi navên;  Sistan Muxtar Momeni û Abu Dhar Umidred ragihand

Li gorî nûçeyê şeva borî derengiya şevê li bajarê Bampûr ê parêzgeha Sîstan û Belûçistanê, 2 fermandarên polîs ji aliyê çend çekdarên nenas ve hatine kuştin û kesên êrîş kirine wekî îsyankar hatine binavkirin.

Hatiye diyarkirin ku herdu fermandarên polîs dema nobetê li xala kontrolê ya deriyê Bompurê di encama êrîşa hejmarek kesan de hatine kuştin û pevçûn derketiye.

Hêjayî gotinê ye ji destpêka xwepêşandanên Jîna Emînî yên seranserî de, heta niha li bajarên Sîstan û Belûçistanê herî kêm 140 xwepêşander bi gulebarana polîsan hatine kuştin ku bi giştî jî li seranserê Îran û Rojhilatê Kurdistanê 525 xwepêşander hatine kuştin.