Nêçîrvan Barzanî: Hilbijartin ji bo cîbicîkirina destûrê û pêvajoyeke nû li Iraqê destpêkek e

PeyamaKurd – Serokê Herêma Kurdistanê û Cîgirê Serokê Partiya Demokrat a Kurdistanê (PDK), Nêçîrvan Barzanî, di hevpeyvîneke taybet de li gel Rûdaw TV, beriya hilbijartinên parlamentoya Iraqê, daxuyaniyên giring dan. Nêçîrvan Barzanî tekez kir ku ev hilbijartin dê ji bo Iraqê bibe "destpêkeke nû" ji bo cîbicîkirina destûrê û çareserkirina pirsgirêkan. Wî her wiha bang li xelkê Kurdistanê kir ku bi awayekî berfireh beşdarî dengdanê bibin.

"Hêza PDKyê baweriya gel e"

Nêçîrvan Barzanî da zanîn ku ew bawer e PDK dê di van hilbijartinan de bibe partiya yekem û got: "Hêza PDKyê ne ji pere, ne ji çek û ne jî ji desthilatê tê; hêza me ji bawerî û piştevaniya gelê Kurdistanê tê." Wî sedema vê baweriyê bi "rastgoyiya" partiyê ve girêda û anî ziman ku PDK her dem bi gel re eşkere bûye, tiştê kariye kiriye û tiştê nekariye jî bi zelalî îfade kiriye. Wî her wiha behsa armanca bidestxistina milyonek dengî kir û got ku ew bawer dike ev armanc dê bi piştgiriya gel pêk were.

"Bexda kûrahiya me ya stratejîk e"

Serokê Herêma Kurdistanê bal kişand ser girîngiya pêwendiyên Hewlêr û Bexdayê û got, "Bexda kûrahiya me ya stratejîk e û divê em pirsgirêkan li ser maseya gotûbêjê çareser bikin." Nêçîrvan Barzanî tekez kir ku çareserkirina pirsgirêkan ne tenê di berjewendiya Herêma Kurdistanê de ye, lê di berjewendiya tevahiya Iraqê de ye. Li gor wî, civaka navneteweyî jî "Herêmeke Kurdistanê ya bihêz di nav Iraqeke federal û aram de" dixwaze. Ji bo vê yekê, banga yekrêziyê li hêzên Kurdî yên li Bexdayê kir û got, "Çi pirsgirêkên me di navbera xwe de hebin jî, dema mijar dibe berjewendiyên Herêma Kurdistanê, divê em xwedî helwesteke hevpar bin."

Pêwendiyên navxweyî û herêmî

Derbarê pêwendiyên di navbera PDK û Yekîtiya Niştimaniya Kurdistanê (YNK) de, Nêçîrvan Barzanî diyar kir ku her çend hin pirsgirêk hebin jî, deriyên diyalogê nehatine girtin û ew serdem derbas bûye ku pirsgirêk bêçareserî bimînin. Wî her wiha amaje bi giringiya hebûna opozîsyoneke saxlem kir û got ku "Rexneyên avaker Herêma Kurdistanê bihêztir dike."

Di warê siyaseta derve de, wî hûrgiliyên hevdîtina xwe ya bi Serokomarê Tirkiyeyê Recep Tayyip Erdogan re eşkere kir. Wî da zanîn ku wî daxwaza vekirina qada asmanî ya Balafirgeha Silêmaniyê kiriye û Serok Erdogan ev daxwaz di cih de qebûl kiriye û spasiya wî kir ji bo vê pêngavê.

Banga beşdarbûna hilbijartinê

Di dawiya axaftina xwe de, Nêçîrvan Barzanî bang li hemû welatiyên Herêma Kurdistanê kir ku roja 11ê Mijdarê biçin ser sindoqan û dengê xwe bidin. "Heta dengek jî ji bo me pir biqîmet e. Divê her kes wê rojê li ser sindoqan amade be," Nêçîrvan Barzanî got û xwest ku gel bi beşdarbûna xwe piştgiriyê bide bihêzkirina pêgeha Kurdistanê li Bexdayê.