Parlamento sibe dicive û Mesrûr Barzanî bo pêkanîna hikûmetê tê erkdar kirin

PeyamaKurd - Hat ragihandin ku îro 10ê Hezîranê piştî merasîma sondxwarina Serokê Herêma Kurdistanê Nêçîrvan Barzanî, Parlamentoya Kurdistanê sibe dicive û Serok Nêçîrvan Barzanî bo pêkanîna hikûmeta nû ya Herêma Kurdistanê, Mesrûr Barzanî erkdar dike.

Serokatiya Parlementoya Kurdistanê bernameya civîna sibehê ya Parlementoya Kurdistanê ragihand û di bernameya civînê de hat gotin, sibe roja 11. 06. 2019an sêşemê saet 11:00an Parlemento dicive û tê çaverêkirin Serokê Herêma Kurdisttanê Nêçîrvan Barzanî bo avakirina Hikûmeta Herêma Kurdistanê Mesrûr Barzanî erkdar bike.

Seroka Parlamentoya Kurdistanê Vala Ferîd jî piştî merasîma sondxwarinê got, “Dê sibe parlamen bo erkdarkirina serokwezîrê nû yê Kurdistanê bicive."

Di hilbijartinên 30yê Îlona 2018an ên Herêma Kurdistanê de, Partiya Demokrata Kurdistanê ji nav 111 kursiyên parlamenê 45 kursî bi dest xistibûn û wekî partiya bûye yekem jî Nêçîrvan Barzanî wekî namzetê seroktiyê û Mesrûr Barzanî wek namzetê serokwezîriyê destnîşan kiribûn.

Tê çaverêkirin piştî ku Mesrûr Barzanî sibe erka avakirina hikûmetê werbigire, di nav 30 rojan de kabîneya nû ya hikûmetê pêşkeşî parlamentoyê bike.