Peyama "Rojava" ya Talebanî di pîrozbahiya sersalê de

PeyamaKurd – Serokê Yekîtiya Niştimaniya Kurdistanê (YNK) Bafîl Celal Talebanî bi boneya sersala nû peyamek belav kir.

Talebanî di peyama xwe de wiha got:

“Sala nû li Kurdistan, Iraq û hemû cîhanê pîroz be. Hêvîdarim sala nû bibe sedema aştî, aramî û ewlehiyê.

Ez di wê baweriyê de me ku di sala nû de em ê hemû bi hev re ji bo bihêzkirin, geşepêdan û pêşvebirina Kurdistanê, bi ruhekî netewî û berpirsyarî tevbigerin.

Emê bi avakirina hikûmeteke xizmetguzarî û dadperwerane hewl bidin ku jiyana xelkê biparêzin û mafên wan bidest bixin û jiyaneke bi rûmet ji gelê Kurdistanê re dabîn bikin.

Em wek Yekîtiya Niştimaniya Kurdistanê diyar dikin ku divê hemû pirsgirêk bi rêyên aştiyane bên çareserkirin û bi taybetî jî em pêşwaziyê li hemû pêşniyarên ku ji bo çareser kirina kêşe û nakokiyên heyî yên di navbera Hewlêr û Bexdayê de tên pêşkêş kirin û gihiştina çareseriyeke mayînde dikin.

Li aliyê din pirsgirêka Kurd li Rojava û Sûriyeyê di qonaxeke dîrokî de derbas dibe. Di vê xalê de pêwîst e em hemû hewldana pêwîst bidin, piştgirî bidin û bi hesteke mezin bi berpirsyarî nêzî mijarê bibin.

Werin em hemû sala nû bikin sala aştî, lihevkirin, edalet û hiqûqê.

Werin em yekitî û yekrêziyê li Kurdistanê bihêztir bikin û paşerojeke geş ji bo gelê xwe ava bikin. Ev berpirsiyariyeke dîrokî ye û dikeve ser milê me hemûyan."