Serokwezîr Barzanî bi Serokê Parlamentoya Urdinê re civiya

PeyamaKurd - Serokwezîrê Herêma Kurdistanê Mesrûr Barzanî, di çarçoveya serdana xwe ya Bexdayê de, bi Serokê Parlamentoya Urdinê Ehmed Sefedî re jî civiya.

Hat ragihandin ku Serokwezîr Mesrûr Barzanî îro 11ê Çileyê li Bexdayê bi şandeke pilebilind a Parlamentoya Urdinê ya bi serokatiya Serokê Parlamentoya Urdinê Ehmed Sefedî re hevdîtinek pêk anî.

Serokê Parlamentoya Urdinê silavên Şah Ebdullahê Şahê Urdinê gihandin serokwezîr Barzanî û diyar kir, dixwazin peywendîyên xwe yên berfireh li gel Herêma Kurdistanê pêş bixin.

Mesrûr Barzanî bal kişand ser peywendiyên dîrokî û dostane yên navbera Herêma Kurdistanê û Şahnişîna Urdinê û amadehiya Herêma Kurdistanê ji bo bihêzkirina pêwendiyên ligel Urdinê di hemû waran de nîşan da.