Serok Barzanî pêswazî li Serokê Parlamentoya Urdinê kir

PeyamaKurd - Serok Mesûd Barzanî, îro Yekşemê li paytext Hewlêrê pêşwazî li Serokê Parlamentoya Urdinê Ebdulmunim El-Odat kir.

Hat ragihandin ku di hevdîtinê de, Serok Barzanî û Serokê Parlamentoya Urdinê Ebdulmunim El-Odat guftûgo derbarê pêwendiyên Herêma Kurdistanê û Urdinê û hevahengiya di navbera her du aliyan de kirin.

Serokê Parlamentoya Urdinê Ebdulmunim El-Odat bi serokatiya şandeke fermî ya welatê xwe, îro Yekşemê 5ê Îlonê gihîşt Herêma Kurdistanê û li Balafirgeha Navdewletî ya Hewlêrê ji aliyê Seroka Parlamentoya Kurdistanê Rêwaz Fayiq û hejmarek parlamenterên Kurdistanê ve hat pêşwazî kirin.

Serokê Parlamentoya Urdinê li Parlamentoya Kurdistanê ligel Desteya Serokatiya Parlamentoyê û serokê fraksiyonên parlamentoyê civiya.

Ebdulmunim El-Odat li Hewlêrê di civîneke rojnamevanî de ragihand, ew di vê serdanê de berjewendiyên giştî yên di navbera her aliyan de guftûgo dikin.

El Odat got: “Pêwendiyeke me ya dîrokî bi Herêma Kurdistanê re heye û her dem ew pêwendiyên me di astên bilind de bûn. Urdin bi girîngî li Herêma Kurdistanê dinêre. Serkirdatiya Herêma Kurdistanê li navçeyê xwedî roleke girîng e.”

Serokê Parlamentoya Urdinê herwiha li Kurdistanê, bi Serokê Hikûmeta Herêma Kurdistanê û Serokê Herêma Kurdistanê re jî dicive.