Sûdanî: Pêdivîya Iraqê hê jî bi hêzên Amerîka û NATOyê heye!

PeyamaKurd - Serokwezîrê Iraqê  Mihemed Şiya Sûdanî cara yekem ji dema avakirina hikûmeta xwe ve eşkere kir ku ji bo jinavbirina DAIŞê pêdiviya Iraqê bi hêzên Amerîka û NATOyê heye ku ew dixwazin wek welatên Kendavê sûdê ji pêwendiyên ligel Amerîkayê bistînin.

Serokwezîrê Iraqê Mihemed Şiya Sûdanî ji rojnameya Wall Street Journal a Amerîkî re gotiye, ti nexşerêyek ji bo vekişîna hêzên hevpeyman ji Iraqê nîne û pêwîstiya Iraqê bi wê yekê heye ku ew bimînin daku DAIŞê bi temamî jinav bibe.

Sûdanî ji WSJê re got: "Metirsî û êrîşên çekdarên DAIŞê ji Sûriyê berdewam in ji bo nav deverên Iraqî, lewra hêzên ewlekariya Iraqî hîn jî pêwîstiya wan bi piştgirî, şîret û rahênana hêzên hevpeymaniyê heye."

'Joe Biden ji bo têkiliyên baş ên Bexda û Washingtonê derfetek e'

Herwiha Sûdanî gotiye, kabîneya wî dixwaze weke Erebistana Siûdî û welatên Kendavê sûdê ji pêwendiyên ligel Amerîkayê werbigire û di heman demê de dikare pêwendiyên baş ligel Îran û Amerîkayê hebe.

Sûdanî ji Wall Street Journal re daye xuyakirin: "Serok Joe Biden ji yên beriya xwe cuda ye û Iraqê ji her kesî çêtir nas dike. Ev yek dikare bibe bingehek ji bo têkiliyek pir baş di navbera Bexda û Washingtonê de."