Tirkiye-Misir | Pistî 11 salan yekem serdana fermî ya asta bilind

PeyamaKurd – Piştî serdana Wezîrê Derve yê Misirî Samîh Şukrî ya 27ê Sibatê ku ji bo erdhejê çûbû Enqereyê, ji Tirkiyeyê jî yekem serdana asta bilind a fermî piştî 11 salan bo Misrê hat kirin.

Wezîrê Derve yê Tirkiyeyê Mevlut Çavuşoglu, îro bi şandeke bilind a hikûmeta Tirkiyeyê re, ji bo asayîkirina pêwendiyên dîplomatîk bi Misirê re, derbasî Qahîreyê bû.

Hat ragihandin ku Çavuşoglu û Şukrî wê li ser mijarên normalkirina pêwendiyan, mijarên herêmî yên wekî Libyayê û pêşxistina bazirganiya navbera herdu welatan gotûbêj bikin.

Hikûmeta deshilatiya AKPê ya Tirkiyeyê, piştî kotedaya 2013an a Misrê ku Ebdulfettah El Sisi hatibû ser deshilatê, pêwendiyên xwe yên dîplomatîk bi Qahîreyê re qut kiribûn. Tirkiyeyê wê demê piştevaniyeke xurt dida rêxistina Îxwanê ku li Misrê hatiye qedexekirin.