Amerîka di çarçoveya lihevkirina ligel Talîbanê hêzên xwe ji Afxanistanê vedikisîne

PeyamaKurd -  Amerîkayê di çarçova lihevkirina bi Talîbanê re ya 29ê Sibatê de, ‎hêzên xwe ji Efxanistanê vedikişîne.‎ Berpirsekî leşkerî yê Amerîkayê, ragihand ku qonaxa destpêkê ya ‎vekişandina hêzên wan ji Afxanistanê dest pê kiriye.

Wî berbirsê Amerîkî ku navê xwe nexwest eşkere bike diyar kir ku, li gor lihevkirina di navbera Talîban û Amerîkayê de, Washington divê di ‎dema 10 rojan de piştî îmzekirina rêkeftinê, dest bi vekişandina hêzên xwe ji Afxanistanê ‎bike û di 14 mehan de jî pêvajoya vekişandinê temam bike.‎

Niha hejmara hêzên Amerîkayê li Afxanistanê 12 hezar e lê li gor rêkeftinê di maweyê 135 rojan de daxe 8 hezar û 600 serbazan.

Divê Talîban peywendiyên xwe ligel el Qaîde û komên çekdar ên radîkal qut ‎bike û li ber wan koman bibe rêgir ku hewl didin êrîşên çekdarî û kiryarên tûndûtûjî bikin.

Herwiha dest ‎bi gotûbêjên ligel hikûmeta Efxanistanê bike ku heta berî îmzekirina vê rêkeftinê, Talîbanê ew hikûmet ‎wek kafir, nerewa û kirêgirtiyê Amerîka û Rojava binav dikir, niha ku rêkeftin hatiye îmzekirin, heta roja ‎‎29ê Gulana îsal jî, hikûmeta Afxanistanê Rêxistina Talîbanê ji lîsteya rêxistinên qedexe û cezakirî ‎derdixe.‎

Ji xeynî hêzên Amerîkayê, NATO û hevpeymanên wê ki ji 39 welatan pêk hatine nêzîka 17 hezar ‎serbazên xwe li Efxanistanê bicîh kirine ku rahênanê bi hêzên hikûmeta Afxanistanê dikin û di warê ‎serbazî de dibin hevkar. Li gor rêkeftinê, NATO jî hemû hêzên xwe ji Efxanistanê vedikişîne.‎

Piştî êrîşa 11ê Îlona sala 2001ê, Amerîkayê hêza serbazî bi nav Afxanistanê û dijî Talîban û Qaîdeyê dest ‎bi şer kir. Şerek ku baca wê bo Amerîkiyan 2 hezar û 400 serbazên Amerîkî û xerckirina zêdeyî yek ‎trîlyon dolar bû. Bo Efxaniyan jî, kuştin û birîndarbûna bi dehan hezar xelkên sivîl, serbazên Efxanî, ‎çekdarên Talîban û wêrankirina serxan û jêrxana aborî ya welatê wan bû.