'Bi vegera PDKê re wê giraniya Kurdan li Kerkûkê ji nû ve zêde bibe'

PeyamaKurd - Berpirsê rêxistina baskê 3 yê PDKê Luqman Kakeyê, li ser vegera PDKê ya Kerkûkê got, “Bi vegera PDKê re wê gelek hevsengî li bajêr bên rastkirin û kurd dê careke din giraniya xwe bidest bînin.”

Kakeyî ji BasNewsê re daye xuyakirin: “Xelkê Kerkûkê li benda vegera fermî ya PDKê ye. Bi vegera PDKê dê hêz vegere bo pirsgirêka kurd û dê bibe piştevanê partiyên din jî. Gelek hêviya xelkê bi PDKê heye li Kerkûkê. Xelkê vî bajarî tîyê azadiyê ye û li benda partiya bihêz e. Ji ber wê di proseyekê de, binkeya encûmena rêveberiya PDKê dê pêşkeşî zanîngeha Kerkûkê bê kirin.”

Berpirsê rêxistina baskê 3 yê PDKê diyar kir, “Vegera PDKê bo Kerkûkê ji bo rasterêkirina proseya siyasî ya Kerkûk û Iraqê xwedî girîngiyeke taybet e. PDK, xwedî hêzeke zelalkirinê ye li Iraqê û giraniya wê heye, hesab bo wê tê kirin. Ev veger bûye daxwazeke gel û girseyî û daxwaziya serekî ya hemwelatiyên kurd ên parêzgeha Kerkûkê ye. Pêngaveke ji bo alîkariya asayîbûna rewşa siyasî û ewlehiya navçeyê ye.”

Herwiha Kakeyî da zanîn ku peyama PDKê û beşdarîya hilbijartinên parêzgehan ronî ye û got: “Peyama biratî û pêkvejiyan û asudeyî û xizmetguzariyê ye, ji bo xelkê û nirxdana bi girseya PDKê û malbatên şehîdan û hemwelatiyên asayî û pêkhate û aliyan e. Herwiha parastina nasnameya Kerkûkê, ji bo wê jî bendewariyên me yên baş derbarê encamên helbijartinê de hene.”

PDK îro bi fermî vedigere Kerkûkê û dest bi xebatên siyasî dike