Çend gundên din li navçeyên Sera û Bilbilê ji aliyê HTSê ve hatin kontrolkirin

PeyamaKurd – Çend gundên din li navçeyên Şera û Bilbilê yên li herêma Efrînê, ji aliyê Heyet Tehrîr El-Şam (Nusra berê) hatin kontrolkirin.

Li gor zanyariyan, do danê êvarê şer û pevçûn li gundên navçeyên Şera û Bilbilê berdewam bûn û di encamê de Teyet Tehrîr El-Şam gundên Qitmê, Dîkmedaş û nahiya Bilbilê kontrol kirin.

Herwiha hjat zanîn, topek li traktorekê ket ku hejmarek karkerên çinîna zeytûnan hilgirtibû û ji ber rewşa şer, tu kes nikarî bi hawara wan ve biçûya û nayê zanîn çend kes bûne qurbanî.

Hêjayî gotinê ye, do çekdarên Tehrîr El-Şamê navenda nahiya Şera û gundê Kefer Cenê, Qitmê û hejmarek gundên din li wê navçeyê ji destê Feyleqa Sêyem kontrol kiribûn.

Heyet Tehrîr El-Şam ji roja 12ê Cotmeha 2022an ve ji bo piştevaniya koma Sultan Silêman Şah “Emşat” û koma Hemzat derbasî herêma Efrînê bû û koma Feyleqa Sêyem neçar kir ku ber bi Ezazê ve vekişe. Heyet Tehrîr El-Şam jî navçeya Cindirêsê, bajarê Efrînê, navçeya Şera û gundên wan kontor kirin û niha berê xwe daya navçeyên Bilbilê û Raco.