Endamê Kongresê Bacon: Divê em zêdetir alîkarî û pistgiriyê bidin Kurdan

PeyamaKurd – Hevserokê Komeleya Piştevaniya Kurd a Kongreya Amerîkayê Don Bacon, cejna neteweyî ya gelê Kurd bi Kurdî pîroz kir û destnîşan kir ku divê careke din sûcên weke Helebçe û Enfalê li dijî Kurdan neyê kirin.

Endamê Kongreyê Bacon di axaftina xwe ya li kongreyê de bi helkefta cejna Newrozê û sersala Kurdî nirxand ku "Kurd hevalbendeke bêhempa ye û li gel hemû bêbextî û bêedaletiyê jî dikare bijî" û wiha pê de çû: "Pêwîst e em zêdetir alîkariya wan bikin û piştgiriya wan bikin."

Don Bacon got, “36 sal berê vê hefteyê, Seddam Husên kabûsek bi ser bajarê aştiyê Helebçeyê barand û ev karesat wê heta hetayê di dîroka mirovahiyê de bimîne. Kiryarên hovane yên ku di dema kampanyayên Enfalê de hatin kirin, tîne bîra me ku mirovahî çiqasî zalim e.”

Birînên Helebce kûr in, di warê laşî û derûnî de ne û wê ji nifşan re wek bîranînek bi êş û sembola hovîtiya şer bimîne."

Endamê Kongreyê Bacon wiha dewam kir: “Tirsa ku wê rojê ketibû serê xelkê Helebceyê, dema ku bi awayekî hovane bi gaza xerdel û gaza dij nervê êrîş li wan hat kirin, bû sedema jiyana bi hezaran mirovên bêguneh. Lê îmha û mezinahiya sûc bi vê yekê re sînordar nebû. Ji bo gelek kesên rizgarbûyî, belaya bermayî ya êrîşa kîmyewî hîn jî wan dikişîne, digel xirabbûna paqijiyê, zêdebûna bûyerên penceşêrê û pirsgirêkên tenduristiyê di zarokên nûbûyî de."

Hevserokê Komeleya Piştevaniya Kurd a Kongreya Amerîkayê Bacon got: “Helebce ne tenê bûyerek yekalî bû, di heman demê de beşek ji kampanyaya Enfalê ya metirsîdar bû. Di du salan de zêdetirî 180 hezar sivîl hatin qetilkirin, gundên wan hatin wêrankirin, jiyana wan ji nedîtî ve hat xerakirin. Rastiya ku Kurdistan hîna jî şopên vê kampanyaya terorê hildaye, bi bîr anîna bedelê bêdengbûna li hember van kiryarên xirab û xerab e.”

Bacon amaje bi wê yekê jî kir ku ne tenê şîna qurbaniyên Helebce û Enfalê, divê zêdetir were kirin û got, “Divê em bi tundî jenosîda ku li ser gelê Kurdistanê hatiye kirin şermezar bikin û pabendbûna xwe bi rêzgirtin û pîroziya jiyana mirovî dubare bikin. Werin em soz bidin ku em ê ti carî rê nedin ku tawanên wiha dubare bibin û ku em ê li cîhanek ku pir caran ji ber nezanî û şîdetê tê xerakirin, parêzvanên aştî û edaletê bimînin."

“Ji bo rêzgirtina ji qurbaniyên Helebçeyê, em bi rêzdarî li berxwedêrên rizgarbûyî yên ku tevî van karesatan cesaret û ruhê wan zindî ye, rêz bigirin.” Bacon got, "Dibe ku cesaret û berxwedana wan me teşwîq bike ku em ji bo careke din sûcên li dijî Helebce neqewimin, xebatên xwe dubare bikin."

"Ez spasiya xwe pêşkêşî hevalbendên me yên Kurd dikim ji bo hevaltî û hevkariya wan di şerê li dijî DAIŞê, El Qaîde û milîsên Şîe yên Iraqê de." Bacon diyar kir ku ew 4 caran şandine herêmê, Kurd hevalbendek bêhempa ne û ew her tim ji wan re "minetdar" e.

Hevserokê Komeleya Piştevaniya Kurd a Kongreya Amerîkayê Don Bacon do bi van gotinan dawî li axaftina xwe anî:

“Îro 21ê Adarê sersala Kurdan e. Mîrate û çanda gelê Kurd a dewlemend her tim cesaretê dide me. Ez sala nû li hemû Kurdên cîhanê pîroz dikim. Hêvîdarim sala nû bi xwe re bextewarî, hêvî û derfetên bêhejmar ji bo geşbûn û serkeftinê bi xwe re bîne. Newroza we pîroz be, Cejna Newrozê bi Kurdî tê wateya sala nû.”