Erdogan: Tirkiye neçar dimîne ji Rûsyayê sîstema berevaniya asmanî S-400 bikire

PeyamaKurd – Serokomarê Tirkiyê Recep Tayyîp Erdogan diyar kir, Amerîka red dike sîstemên Patriot bifiroşe Tirkiyê, ji ber wê jî Tirkiye neçar dimîne ji Rûsyayê sîstema berevaniya asmanî S-400 bikire.

Serokomarê Tirkiyê Recep Tayyîp Erdogan di hevpeyvînekê bi rojnameya “New York Times” de da zanîn: “Eger Amerîkiyan sîstemên Patriot firotibana Tirkiyê, Tirkiye neçar nedibû moşekên S-400 ji Rûsyayê bikire.”

Erdogan eşkere kir, kirîna Tirkiyê sîstema berevaniya asmanî ji Rûsyayê, bandor li ser pêwendiyên Tirkiye û Amerîka kir.

Erdogan ragihand: “Mafê me heye li gorî tiştên ku em guncaw dibînin, karînên xwe yên parastinê xurt bikin.”

Rêkeftina moşekî ya S-400 di navbera Enqere û Moskowê de yek ji sedemên sereke yên aloziya di pêwendiyên Amerîka û Tirkiyê de ye. Herwiha Amerîka jî bêhtirî carekê nîgeraniya xwe nîşan da û dît ku ev peyman, hevkariya leşkerî-teknîkî a di navbera hevkarên NATO de sînordar dike.