Herêma Kurdistanê bersiveke tund da raporta HRWê!

PeyamaKurd – Serokê Komîteya Nirxandina Raporên Rêxistina Navdewletî ya Herêma Kurdistanê Dîndar Zêbarî li ser raporta HRWê axivî û got, li Herêma Kurdistanê rêz li azadiya takekesî û civakî tê girtin.

Çavdêriya Mafên Mirova (HRW); di “Rapora Cîhanî ya 2023” de, rexne li Herêma Kurdistanê hatine kirin ku hin berpirsan opozisyonê tepeser kirine û kesên xwedî nêrînên cuda bûne armanc, çalakvan û rojnamevan hatine girtin û “qanûnên bi gotinên nezelal” hatine bikaranîn.

Di raporê de hat eşkerekirin, "Li Hewlêrê, rayedarên Hikûmeta Herêma Kurdistanê tevî ragihandina planeke nû ya 5 salî ya ji bo çareserkirina pirsgirêkên mafên mirovan li Herêma Kurdistanê, gefan li mafên bingehîn ên mirovan dixwin û aktorên civaka sivîl hedef digirin."

"Ji bo parastin û pêşxistina azadiya ramanê planeke me ya girîng heye"

Herwiha Zêbarî bersiva rapora HRWê da û eşkere kir, “Hikûmeta Herêma Kurdistanê mînakeke serkeftî ya demokrasiyê ye û di nav de jî mafê azadiya derbirînê nîşan dide.

Di berdewamiya gotinên xwe de Zêbarî da zanîn, “Ji bo parastin û pêşxistina azadiya derbirînê planeke me ya girîng heye. Hikûmeta Herêma Kurdistanê daxwaz ji dezgehên dadwerî dike, yasaya rojnamevaniyê bi vî awayî bicîh bînin.”

“Me ji Neteweyên Yekbûyî (NY) û gelek rêxistinên sivîl daxwaz kir ku ji bo xurtkirina pergala me ya dadweriyê bi me re hevkariyê bikin û em di vê mijarê de pir ciddî ne. Em piştgiriyê didin meşandina azad a hemû xebatên rojnamegeriyê û em li dijî astengkirina van çalakiyan in.”

Di rapora HRWê de herwiha bal hat kişandin ser operasyonên Tirkiyê yên di nav sînorên Herêma Kurdistanê de.