Îro 8emîn salvegera Qirkirina Êzidiyên Sengalê ye!

PeyamaKurd – Berî niha bi heyşt salan, rêxistina terorîst a DAIŞê girt ser warê Kurdên Êzîdiyên Şengalê. Jin, zarok, kalemêr-pîrejin jî di nav de, ji 5 hezaran zêdetir Kurdên Êzîdî qetil kirin, bi sedan mêr kuştin û bi hezaran jinên Êzîdî kirin kole. Bi hezaran kes dîl girtin, bi sed hezaran kes koçber kirin û komkujiyeke mezin pêk anîn û piştî komkujiyê bi hezaran jin li bazaran wek kole hatin firotin.

Heyşt sal berê, di 3yê Tebaxa 2014an de, çekdarên rêxistina tororîst ên DAIŞê, di saet 2yê şevê de girt ser Şengalê, li ber çavê hemû cîhanê ji 10 salî mezintir hemû xort û mêr kuştin, 7 hezar jin ji aliyê çekdarên DAIŞê ve hatin revandin, cara yekem li pêşiya hemû cîhanê jin li bazaran hatin firotin, bi dehan gorên komî yên Êzîdiyan hatin dîtin.

Ji nav 200,000 kesên ji malên xwe ji bajarê Şengalê û gundên dewrûber reviyan, nêzîkî 50,000an xwe li çiyayê Şengalê girtin. Şervanên DAIŞê dora wan girt û li ser çiya asê man. Di sê rojan de, bi dehan Êzîdî, tevahiya wan zarok ji tîna mirin. Wan bangî xelkê xwe li seranserî cîhanê û li Amerîka kir, da ku herin hewara wan û wan ji wê dorgirtinê rizgar bikin.

Di 4ê Tebaxa 2014an de, Mîrê Êzîdiyan banga xwe gîhand rêberên cîhanê ji bo alîkariyê. Welatên Yekgirtî Amerîka, bersiva wê bangê da û dest bi êrîşên balafiran li dijî DAIŞê kir, piştevaniya alîkariyên mirovanî ya xwarin, av û vexwarinê ji balafiran kirin.

Ev alîkariya pêşîn bû, bû sedema pêkanîna hevbendiyek nêvneteweyî bo şikandina DAIŞê û destkpêka dawiya DAIŞê. Heta nîvê meha Kanûna 2014an, hêzên Kurdan dest bi yekem qonaxa kampanya derxistina DAIŞê ji Şengalê kir û berî sal bi dawî bê, wan beşek bajar rizgar kir. Di 13ê Çirya Paşî, rojekê berî destpêkirina qonaxa duyan, hêzên Kurdan yên Êzîdiyan bi piştevaniya êrîşên balafirên hevpeymanê, bi yek carî Şengal ji destê DAIŞê rizgar kir.