Japonya, Îngilîstan û Îtalya ji bo projeya balafirên ser ên hevpar lijneya koordînasyonê ava dikin

PeyamaKurd – Li hember zêdebûna metirsiyên herêmî yên li Hind-Pasîfîkê, hukûmeta Japonî armanc dike ku projeyên berevaniyê yên berfireh û hevkariya bi welatên dost ên di nav NATO de bilez bike. Wezîra Parastinê ya Japonyayê Kihara Minoru li paytext Tokyoyê bi Wezîrê Parastinê yê Îngilîstanê Grant Shapps û Wezîrê Parastinê yê Îtalyayê Guîdo Crosetto re hevdîtin kir.

Di civînê de, "Bernameya hewayî ya şer a cîhanî" ku sala borî ji aliyê her sê welatan ve hatibû ragihandin û pabendbûna bi projeya hevbeş a pêşxistina balafirên şer heta sala 2035an hatin gotûbêjkirin. Wezîran li hev kirin ku lijneyek hevrêziyê di navbera pargîdaniyên peymankar de were damezrandin da ku projeya pêşvebirina balafirên şer ên hevbeş di navbera her sê welatan de heya sala 2035 were cîbicîkirin.

Sêwiran wê heya 2027an biqede

Pisporên peymankarên sereke yên di projeya balafirên şer de Mitsubishi Heavy ji Japonyayê, BAE Systems ji Îngilîstanê û Leonardo S.P.A ji Îtalyayê wê beşdarî lijneya koordînasyonê bibin. Di çarçoveya "Bernameya Hewayî ya Şer a Cîhanî" de ku di Kanûna 2022'an de ji raya giştî re hat ragihandin, lijneya koordînasyonê wê armanc bike ku sêwirana balafirên şer heta sala 2027an temam bike. Piştî ku Serokwezîr Kishida Fumio bû "yekemîn serokwezîrê Japonî" ku beşdarî Civîna Bilind a NATO ya li Madrîdê di sala 2022an de bû, Japonya berdewam dike ku hevkariyê bi hevalên xwe re di yekîtiyê de kûr bike. Hikûmeta Tokyoyê wê nêzî 90 balafirên şer ên F-2 yên di nava Hêzên Xweparastina Hewayî ya Japonyayê (ASDF) de teqawid bike û balafirên şer ên nû bi cih bike.