Ji bo asayîkirina pêwendiyên bi Sûriyê re çar sertên Tirkiyê hene!

PeyamaKurd – Çavkaniyên Tirkiyê şert û mercên ku Enqereyê di hevdîtinên normalîzekirina çaralî yên di navbera cîgirên wezîrên karên derve yên Tirkiye, Rûsya, Sûriye û Îranê de di çarçoveya Lûtkeya Astanayê ya 20emîn ku di 20-21ê Hezîranê de hat lidarxistin de, danîbû pêşiya Sûriyê eşkere kirin.

Ewlekariya sînoran, vegera penaberan, makezagoneke nû û hilbijartinên giştî di nav wan de ne.

Rojnameya Yenî Şafak a bi nêzîkbûna xwe ya bi hikûmetê re tê naskirin, nûçeya xwe li ser çavkaniyeke ku weke "asta bilind" bi nav dike, nirxand û îdia kir, şanda Tirkiyê di hevdîtinên çaralî de ku nexşerêya Rûsyayê ji bo asayîkirina pêwendiyên Enqere-Şamê hat gotûbêjkirin, çar şert pêşkêşî şanda Sûriyê kirin ku ew wan "pêwîstî ji bo avakirina baweriyê" dîtin.

Çavkaniyê da zanîn, Enqere li benda bersiva Şamê ya ji bo şert û mercan e û got ku ji van şertan ya yekem “têkoşîna li dijî rêxistinên terorîst e”. Herwiha got, aliyê Tirkiyê pêşniyar dike ku "mekanîzma hevahengiya leşkerî ya çaralî ji aliyên danûstandinê re were avakirin da ku operasyonên hevbeş li dijî navçeyên terorîstî organîze bikin".

“Dema ku artêşa Tirk ji vir vekişe wê kî ewlehiya herêmê misoger bike? Ma hûn dikarin van zilaman di bin kontrolê de bihêlin? Dema ku em li ser dipirsin, ew nikarin bersiv bidin, "wî got.

Heman çavkaniyê diyar kir ku aliyê Tirkiyê ji Sûriyê xwest ku “li ser vegera ewle ya penaberên Sûriyê sozên nivîskî bide”. Û wî got jî ku şanda Tirkiyê li Astana pêşniyar kir, "penaberên ku wê vegerin welatên xwe, pêşî li deverên ewle bên ragirtin û yên ku bixwazin dikarin vegerin bajarên ku berê lê dijîn".

Daxwaza sêyem a Tirkiyê “pêvajoya siyasî û birêvebirina wê û amadekirina destûreke nû” ye, ya çarem jî “lidarxistina hilbijartinên giştî bi beşdariya hemû Sûriyên cîhanê” ye.