Kabîneya Kurdistanê li ser encamên hevdîtinên Bexdayê û bicihanîna madeya 140 dicive

PeyamaKurd – Hat ragihandin ku wê roja Çarşema 7ê Kanûnê Encûmena Wezîran a Hikûmeta Herêma Kurdistanê bi seroktiya Serokwezîr Mesrûr Barzanî, li ser serdan û hevdîtinên Bexdayê yên şanda bilinda a Hikûmeta Kurdistanê û xebatên bo bicihanîna madeya 140 a destûra Iraqê bicive.

Hat zanîn ku wê di civînê de encamên serdan û civînên ligel şandên bilind ên Herêma Kurdistan û Bexdayê bên eşkere kirin û li ser wan nirxandin û gotûbê bên kirin.

Herwiha wê nirxandina li ser civînên ligel berpirsên payebilind ên Iraqê li ser mijarên budce, neft, gaz, deriyên sînor û Dîwana Çavdêriya Iraqê  bê kirin.

Li gorî karnameya civînê wê mijara navçeyên Kurdistanê yên derveyî îdareya Herêma Kurdistanê û xebatên bo bicihanîna madeya 140 jî bên gotûbêj kirin ku Parlamentoya Iraqê roja 27ê Cotmeha 2022yan di karnameya hikûmeta nû ya Iraqê ew mijar jî pejirandibû.